Уны йыл һайын эшҡыуарҙарҙан һорау алыу нигеҙендә Стратегик башланғыстар агентлығы ойоштора. 2023 йыл йомғаҡтары буйынса Башҡортостан Мәскәү һәм Төмән өлкәләре менән бергә үҙенең күрһәткестәрен бер позицияға яҡшыртып, өсөнсө урын яуланы. Рейтингтың беренсе баҫҡысын Мәскәү биләй, ә икенсе баҫҡысты Түбәнге Новгород өлкәһе менән Татарстан бүлешә. Башҡортостан Башлығы Радий Хәбиров Стратегик башланғыстар агентлығы командаһына, илдең эшлекле берләшмәләренә һәм төбәк губернаторҙарына инвестиция йәлеп итеүсәнлеген арттырыу буйынса әүҙем эшләгәндәре өсөн рәхмәт белдерҙе. 2023 йылда республикабыҙ иҡтисадына инвестицияларҙың дөйөм күләме 7,6 процентҡа артып, 620 миллиард һумға барып баҫҡан. Ә 2019 йылдан 2023 йылға тиклем төбәккә инвестиция ағымы 52,9 процентҡа артҡан. Төбәк һәм муниципаль кимәлдә даими рәүештә “Инвестиция сәғәттәре” һәм “Эшҡыуарлыҡ сәғәттәре” үткәрелә. Уларҙа яңы проекттарға булышлыҡ итеү тураһында ҡарар ҡабул ителә. Әйткәндәй, 2024 йылдың йәй башына ҡарай төбәктә бөтәһе 360-тан ашыу өҫтөнлөклө инвестиция проекты тормошҡа ашырыла: инвестицияларҙың дөйөм күләме яҡынса 854 миллиард һум тәшкил итә, 34 мең яңы эш урыны булдырыла. *** Журналистар менән әңгәмәлә Башҡортостан Башлығы төбәктең инвестиция сәйәсәтенең яңы йүнәлештәрен үҫтереү хаҡында һөйләне. – Һуңғы йылда беҙ ныҡ алға киттек. Әлбиттә, һуңғы биш йылда беҙ инвестициялар буйынса үҫтек. Әммә бер мәл мин был хәрәкәттең туҡтағанын күрә башланым. Беҙ нимә булғанын анализлай башланыҡ. Ысынлап та, бизнесмендар бик эшлекле кешеләр, уларға артыҡ дәүләт бюрократияһы ҡамасаулай, шуға күрә беҙ республика менән үҙ-ара эш итеүҙе дебюрократлаштырҙыҡ, – тине Радий Хәбиров. – Шул уҡ ваҡытта беҙ һәр ваҡыт үҙ иҫәбенә ҡарарҙар ҡабул иткән бизнесҡа бик рәхмәтлебеҙ. Ул үҙенең мөлкәтен, статусын хәүеф аҫтына ҡуя. Эшҡыуарҙарыбыҙҙың Башҡортостанға инвестициялар һалырға ҡарар итеүе – идара итеү командаһына етди ышаныстың бер өлөшө. Фото: glavarb.ru