7 июндә Петербург халыҡ -ара иҡтисади форумында Башҡортостан Башлығы Радий Хәбиров Рәсәйҙең триатлон федерацияһы президенты, “Геройҙар уҙышы” проекты етәксеһе Ксения Шойгу менән осрашты. Улар республикала триатлон үҙәген булдырыу концепцияһын тикшерҙе, шулай уҡ был дисциплинаны популярлаштырыу мәсьәләләре тураһында ла һөйләште. Башланғысты тормошҡа ашырыу сиктәрендә “Патриот” паркы биләмәһе эргәһендә үҙәкте төҙөү майҙансығы һайланылды. Планда был проектты тормошҡа ашырыуҙың финанс-иҡтисади моделен әҙерләү бурысы тора. Ксения Шойгу төбәк етәксеһенә триатлон үҙәген булдырыу буйынса проектҡа иғтибарлы мөнәсәбәт өсөн рәхмәт белдерҙе. -Беҙ республикала бер нисә вариантты ҡараныҡ һәм һәм оптималь урынды таптыҡ. Үҙемдең яҡтан тағы ла биш федерация менән килешергә әҙербеҙ. Улар спорттың цикллы төрҙәре менән шөғөлләнә, шуға базаны йыл әйләнәһенә ҡулланырға мөмкин, - тине Ксения Шойгу. – Һеҙҙең команданың үҫештең яңы варианттарын тәҡдим итеүенә шатмын, һәм беҙҙә был йәһәттән йәнле, әүҙем эш бара. Төбәк етәксеһе Радий Хәбиров республиканың һәм Рәсәйҙең триатлон федерацияһының ҡаршылыҡтар менән уҙыш өсөн трассаны төҙөү буйынса берлектәге эшенең һөҙөмтәлелеген билдәләне. -“Геройҙар уҙышы” маршрутын беҙ бергә булдырҙыҡ. Һеҙҙең белгестәр был проектты тормошҡа ашырыуҙа ныҡ ярҙам итте, – тине Радий Хәбиров. Фото: Башҡортостан Башлығы сайтынан.