Бәләкәйҙән эшләп үҫкән оло кешеләрҙең, ғәҙәттә, тик ултырғыһы килмәй. Әле тегеһен, әле быныһын башҡарырға ынтылып ҡына торалар. Билдәле йырсы, Башҡортостандың халыҡ артисы Сәғиҙулла Байегеттең дә әсәһе Әминә инәйгә 88 йәш булыуға ҡарамаҫтан, ҡулына салғы алған. Йырсы үҙенең бала сағы тураһында һөйләгәне бар. Аталары вафат булғас, әсәһенең ыҙалыҡ менән күп баланы кеше иткәнен тәфсирләгәйне. Шунда Әминә инәй иңенә төшкән ауырлыҡтарҙан күҙгә йәш килгәйне. Шөкөр, бөгөн инәй ҡәҙер-хөрмәттә йәшәй. Һәр хәлдә улы Сәғиҙулла уға гел генә шул тиклем оло мөхәббәт менән ҡарай, был уның яҙмаларында һәм видеоларында сағыла. Әле килеп әсәһенең бесән сапҡанын да шундай йылылыҡ менән "әсәйемдән мастер-класс" тип шаяртып видеоға төшөргән. Берүк оло кешене эшләтә тип уйламағыҙ, Әминә инәйҙең бала сағын, йәш сағын иҫкә төшөргөһө килгәндер. Афарин, инәй! Әсәйең оҙаҡ, бәхетле йәшәһен, Сәғиҙулла! Фото: С. Байегеттең шәхси архивынан.