Был көндәрҙә республикабыҙ бөйөк рус шағиры Александр Пушкиндың тыуыуына 225 йыллығын билдәләй. Ошо айҡанлы баш ҡалабыҙҙың Пушкин аллеяһында шағирға арналған “Шиғриәт сәғәте” булып уҙҙы. Унда билдәле йәмәғәт һәм дәүләт эшмәкәрҙәре, яҙыусылар, шағирҙар ҡатнашты. Шағирҙың бюсына сәскә һалдылар һәм шиғырҙарын уҡынылар. Барыбыҙ ҙа бала саҡтан уҡ ижады менән таныш булған, яратҡан шағирыбыҙ – XIX быуаттың беренсе сирегендәге иң абруйлы әҙәбиәт эшмәкәрҙәренең береһе. Үҙе иҫән саҡта уҡ уның бөйөк рус милли шағиры тигән абруйы барлыҡҡа килә. Ул хәҙерге рус әҙәби теленә нигеҙ һалыусы булараҡ та таныла. Башҡортостандың мәҙәниәт министры Әминә Шафиҡова ла рус шағирының беҙгә әҙәби тел һәм мәңгелек ижад ҡалдырыуын билдәләп үтте: – Александр Пушкин беҙгә бөйөк мираҫ, бөйөк ижад ҡалдырып киткән. Үҙенең ижадында ул башҡорттарҙы ла яҙа. Мәҫәлән, билдәле “Капитан ҡыҙы” әҫәрендә уларҙы бик тапҡыр һүрәтләп бирә. Беҙ бөгөн тарихыбыҙҙың ҡайһы бер өлөшөн тап Пушкиндың әҫәрҙәре аша беләбеҙ. Пушкин – ул һәр бер бала бишектә ятҡанда уҡ яратып тыңлаған әҙип. Һәр бала уның әкиәттәре менән үҫә һәм илебеҙҙең һәр бер зыялыһы уның ижады менән йәшәй. Шуға күрә лә бөгөн беҙ уның хаҡындағы яҡты иҫтәлектәрҙе яңыртыуыбыҙ менән киләһе быуынға уның бөтә донъя өсөн мөһим икәнен күрһәтәбеҙ. Бөгөн иһә бөйөк рус шағирының шиғырҙарын башҡорт теленә тәржемә итеп уның ижадын башҡорт әҙәбиәте тарихында ҡалдырыусылар ҙа бар. Башҡортостандың халыҡ шағирҙары Гүзәл Ситдиҡова, Гөлфиә Юнысова һәм Яҙыусылар союзы рәйесе урынбаҫары шағирә Тәнзилә Дәүләтбирҙина булып уҙған “Шиғриәт сәғәте”ндә Пушкиндың тәржемә әҫәрҙәрен уҡып ҡабатланмаҫ ижады менән уртаҡлашты. Сараны Башҡортостандың Милли әҙәбиәт музейы Яҙыусылар союзы һәм Мәҙәниәт министрлығы менән берлектә уҙғарҙы. Тыуыуына 225 йыл үтһә лә, һаман да башҡорт менән рустың ғына түгел, бөтә донъя халыҡтарының яратҡан шағиры булып ҡалған бөйөк Пушкинға был көндө ниндәй генә хөрмәт күрһәтеп, иҫтәлегенә ниндәй генә шиғырҙар бағышлап, һәйкәлдәренә сәскәләр һалһаң да аҙ. Әйткәндәй, ул бөтә Ер йөҙөндә һәйкәлдәре булған берҙән-бер шағир. Ике быуат ғүмер үтһә лә, бөгөнгө ҡатмарлы заманда халыҡтарҙың, милләттәрҙең күңелдәрен яҡтылыҡ, ижад, матурлыҡ менән тоташтырып тороусы шағирҙы юҡҡа “Рус шиғриәтенең ҡояшы” тип атамағандарҙыр. Хәйер, ул беҙҙең дә тарихыбыҙҙы мәңгелеккә яҙып ҡалдырыуы менән башҡорт тарихының, башҡорт әҙәбиәтенең шағиры-яҙыусыһы исеменә дәғүә итәлер кеүек... Автор фотолары.