"Таврос" компаниялар төркөмө менән хеҙмәттәшлеккә ҡул ҡуйылды

6 июндә Петербург халыҡ-ара иҡтисади форумында Башҡортостан Башлығы Радий Хәбиров һәм «Таврос» компаниялар төркөмөнөң Директорҙар советы ағзаһы Рөстәм Мирғәлимов Шишмә районында «Агродеревня» туристик кластерын һәм Өфө районында агросәнәғәт паркын төҙөү тураһында инвестиция килешеүҙәренә ҡул ҡуйҙы. «Таврос» компаниялар төркөмө Башҡортостан баҙарында 12 йылдан ашыу эшләй һәм ит етештереү һәм эшкәртеү, шулай уҡ йомортҡа, шәкәр һәм ҡатнаш аҙыҡ етештереү менән шөғөлләнә. Был ваҡыт эсендә инвестор республиканың агросәнәғәт комплексын үҫтереүгә 20 миллиард һумдан ашыу аҡса һалған, 5,9 миллиард һум күләмендә дәүләт ярҙамы алған. Компаниялар төркөмө предприятиелары Әлшәй, Бәләбәй, Благовар, Бүздәк, Дәүләкән, Кушнаренко һәм Шишмә райондарында уңышлы эшләй. 2024 йылда “Таврос" Башҡортостанда дөйөм суммаһы 16,8 миллиард һумлыҡ биш инвестиция проектын тормошҡа ашырыуҙы дауам итә. Улар иҫәбендә - Шишмә районында «Агродеревня» туристик кластерын һәм Өфө районында «Таврос Агропарк» агросәнәғәт паркын төҙөү. Иҫегеҙгә төшөрәбеҙ, һуңғы проект «Инвестиция сәғәте» ултырыштарының береһендә хуплау тапты. Һүҙ ауыл хужалығы продукцияһын эшкәртеү өлкәһендә буласаҡ резиденттар өсөн махсус майҙансыҡ булдырыу хаҡында бара. Журналистар менән әңгәмәлә Башҡортостан Башлығы Радий Хәбиров республикала агросәнәғәт тармағын үҫтереүгә иғтибар арттырылыуын билдәләне. - Форумда беҙ Рәсәйҙең алдынғы ауыл хужалығы етештереүселәре менән осрашабыҙ. Таврос - күп функциялы компаниялар төркөмө. Уның активтарында – сусҡа ите, ҡош ите, шәкәр етештереү, - тип һөйләне Радий Хәбиров. - Быйыл уларҙың Авдондағы фабрикаһы етди зыян күрҙе - ҡош киҙеүе таралыу ҡурҡынысы арҡаһында ҡоштарҙың бер өлөшөн юҡ итергә тура килде. Беҙ етәксе менән ошо хаҡта һөйләштек, производствоның хәҙерге этапта нисек үҫешеүен тикшерҙек. Минең бурысым - инвесторҙарҙы үҫешкә этәреү. Ә «Таврос» компаниялар төркөмөн республика иҡтисадына аҡса һалырға әҙер булған бик яуаплы эшҡыуарҙар етәкләй. Сығанаҡ һәм фото: https://glavarb.ru/rus/press_serv/novosti/178795.html