“Башҡортостан” гәзитенең “Бәйләнештә” төркөмөндә барған конкурста ихлас ҡатнашҡан Хәсәнова Фәйләрә Бәхтинур ҡыҙы Мәһәҙей ауылында фельдшер булып эшләй. Үткән быуаттың 90-сы йылдарында Башҡорт дәүләт медицина университеты ҡарамағындағы Өфө медицина училищеһының “Дауалау белеме” бүлеген тамамлап эш башлаған медик ғүмере буйы бер урында эшләй. Бала сағынан хеҙмәт һөйөп үҫкән замандашыбыҙ фельдшер ауылда киң профилле һөнәр эйәһе икәнен аңлап, массаж эшләү серҙәренә лә төшөнгән, гирудотерапия (һөлөк ҡуйыу) буйынса ла белем эстәгән. Ҡасандыр Бөрйән районының “Ағиҙел” колхозында фельдшер булып хеҙмәт юлын башлаған Фәйләрә Бәхтинур ҡыҙының 35 йыл хеҙмәт стажы бар. 33-ө Мәһәҙей фельдшер-акушерлыҡ пунктында халыҡты ҡабул итеп үткән, тиһәк, һис хата булмаҫ, моғайын. Әйткәндәй, уның тырышлығы, уңғанлығы менән Мәһәҙей фельдшер-акушерлыҡ пункты районда иң яҡшылар иҫәбендә. Фельдшер-акушерлыҡ пунктында эш юғары кимәлдә ойошторолған, санитар-гигиена нормалары режимы теүәл үтәлә. Быйыл июндә бында яңы фельдшер-акушерлыҡ пункты асылыр тип көтөлә. Ғөмүмән, медицина хеҙмәткәрҙәре өсөн шарттар яҡшыртыла. Ә Бөрйән фельдшеры эшендә урындағы ауыл халҡы һәм биләмә хакимиәте башлығы Нуриман Әминев тә ярҙамлаша. Ғаиләң эшеңде аңлаһа, икенсе яртың барлыҡ башланғыстарыңды хуплап торһа, ғүмер карабы ла алға “сайпылмай” бара. Фәйләрә Бәхтинур ҡыҙы ире Хәбир Басир улы менән Филиә исемле ҡыҙ һәм Хәмит исемле ул үҫтергәндәр. Улар белем алған, хеҙмәт юлын күптән башлаған. Ҡыҙҙары үҙе өс балалы әсәй инде. Филиә менән Роберт Кинйәкәевтәр ғаиләһендә өс бала – Нургиз, Илгиз һәм Эльвина буй еткерә. Ҡыҙсыҡҡа ике генә йәш әле. Ул һәм ағайҙары, әсәһе, өләсәһе-олатайы – барыһы ла – атайы Роберттың махсус хәрби операциянан еңеү яулап имен-һау ҡайтыуын көтә. Беҙ ҙә уның һәм башҡа ир-егеттәрҙең тыуған яҡтарына имен-һау ҡайтыуын теләйбеҙ. - Донъялағы иң төп хазина – ул ғүмер, һаулыҡ, – ти Бөрйән фельдшеры Фәйләрә Хәсәнова. Уға һәм медицина тармағында хеҙмәт иткәндәрҙең барыһына ла сәләмәтлек теләйбеҙ һәм етеп килгән һөнәри байрамдары менән тәбрикләйбеҙ, еңел булмаған эштәрендә уңыштар теләйбеҙ. Ә һеҙ, ҡәҙерле дуҫтар, “Башҡортостан” гәзитенең “Бәйләнештә” төркөмәндәге конкурста ҡатнашҡан Фәйләрә Хәсәнова өсөн тауыш бирегеҙ, лайктар ҡуйығыҙ һәм етеп килгән һөнәри байрам айҡанлы изге теләктәрегеҙҙе яҙығыҙ. Әйткәндәй, быйыл Фәйләрә Бәхтинур ҡыҙына - 55, Хәбир Басир улы менән ғаилә ҡороуҙарына 35 йыл тулған. Фотолар: Фәйләрә Хәсәнованың шәхси архивынан.