Һөйөнөгөҙ, дуҫҡайҙарым!Байрам бөгөн, Ҡорбан бөгөн;Һәр мосолман ҡәлбенәБайрам ҡошо ҡунған бөгөн.Һайрай ул ҡош: “Аллаһ әкбәр,Аллаһ әкбәр!” – тип ҡуя.“Һөй, мосолман, байрамыңды –Аллаһ яҡлар!” – тип ҡуя, тигән юлдар бар Шәйехзада Бабичтың "Ғәйет ҡорбан" шиғырында. Бөгөн мосолман донъяһында иң ҙур байрамдарҙың береһе - Ҡорбан ғәйете. Ул өс көн дауам итә. Ҡорбанды ошо өс көндә лә ҡояш байығанға тиклем салырға мөмкин. Малдың йәшенә килгәндә, айырым ҡағиҙәләр бар. Мәҫәлән, кәзә малы бер йәшлек булырға тейеш. Әгәр һимеҙ икән, алты айлыҡ һарыҡты салырға рөхсәт ителә. Шулай ҙа уның да бер йәшлек булыуы хәйерлерәк. Һыйыр малының иһә өс-биш йәшлеге һайланырға тейеш. Тағы ла шуныһы бар: кәзә-һарыҡ бер кеше өсөн салынһа, һыйыр менән дөйә – етәүгә. Ҡорбанлыҡ уртаса һимеҙлектә, етешһеҙлектәрҙән азат, ағзалары теүәл булырға тейеш. Ғәмәл алдынан доға ҡылына, ҡуйҙы аҙапламаҫ өсөн бысаҡ яҡшы итеп үткерләнә. “Бисмилләһ, Аллаһу әкбәр!” – тип әйтеп, малды тиҙ, оҫта, матур итеп салыу кәрәк. Салғас, "Йә Аллаһ, был ҡорбанды Үҙеңдең һөйөклө Мөхәммәтеңдән, Ибраһим пәйғәмбәрҙән ҡабул иткән кеүек ҡабул ҡыл", тип доға уҡыла. Мал салынғас, ите һәйбәт итеп һуйыла. Тиреһен хәйер итеп биреү хуплана, һатырға ярамай. Ә инде ит, өс өлөшкә бүленеп, тәүгеһе – үҙең һәм ғаиләң өсөн, икенсеһе туғандар, ҡәрҙәштәр менән ризыҡланыуға ҡалдырыла, өсөнсөһө ҡорбан сала алмағандарға, өлкән йәштәгеләргә, мохтаждарға таратыла. Шул саҡта ҡылынған ғәмәл хәйерле була. Борон ҡорбанлыҡтың бөтөн өлөштәре лә эшкәртелгән. Бөгөн иһә ҡайһы саҡта әрәм-шәрәм итеү осраҡтары бар: мәҫәлән, малдың башын, тиреһен, эс-ҡарынын ташлайҙар. Исраф ҡылыуға юл ҡуйырға ярамай. Булғанды әрәм итеү – гонаһ. * * * “Раббыңдың ризалығы өсөн намаҙ уҡы һәм ҡорбан сал!” – тип бойоролған изге “Ҡөрьән Кәрим”дә. Хаҡ Тәғәләнең барлығына һәм берлегенә инаныуҙы, йомартлыҡты сағылдырған изге ғәмәлде башҡарған кеше Аллаһ алдында ҙур сауапҡа өлгәшә. Ҡорбан салыуҙың, ошо уңайҙан Ҡөрьән уҡытыуҙың ғаилә өсөн бәрәкәте иҫәпһеҙ-хисапһыҙ. Йортобоҙ, күңелебеҙ нурға күмелә, балаларыбыҙ, туғандарыбыҙ дингә яҡынлай, доға мәрхүмдәрҙең рухын яҡтырта... Пәйғәмбәребеҙ Мөхәммәт ғәләйһис-сәләмдең ҡорбан салыу хаҡында хәҙистәре бихисап. Уларҙы уҡыу, өйрәнеү, белмәгәндәргә еткереү дөйөм үҫешкә ҙур бәрәкәт бирер. Изге ғәйет көндәрендә игелектәребеҙ ишәйә, иманыбыҙ яңыра, күңелдә мәрхәмәт, килер көндәргә ышаныс арта. Мосолмандар мәжлестәр уҙғара, бүләктәр бирешә. Туғандар, яҡындар менән күрешеү үҙ сиратында тормошҡа ҙур бәрәкәт бирә. Ошо сауап-бәрәкәттәрҙән мәхрүм ҡалмайыҡ. Ҡорбан ғәйете менән, хөрмәтле ҡәрҙәштәр! Айрат Нурмөхәмәтов фотоһы.