15 июндә Башҡортостан Башлығы Радий Хәбиров Бәләбәйҙең тарихи үҙәгендә “Иҫке ҡала кварталы” йәмәғәт биләмәһен ҡараны һәм Марс Әмиров исемендәге бульварҙы төҙөкләндереү проекты менән танышты. 2021 йылда биләмәне төҙөкләндереү концепцияһы бәләкәй ҡалаларҙа һәм тарихи ауылдарҙа уңайлы ҡала мөхитен булдырыу өсөн Бөтә Рәсәй иң яҡшы проекттар конкурсында еңеү яуланы. “Иҫке ҡала кварталы” проектын 2022-2023 йылдарҙа тормошҡа ашырғандар. Эштәрҙең дөйөм хаҡы 180,5 миллион һум тәшкил итте, уларҙың 80 миллион һумы – федераль грант аҡсаһы. Бәләбәй районы хакимиәтенең баш архитекторы Айгөл Иванова һөйләүенсә, 2021 йылда Рәсәйҙең Төҙөлөш министрлығы конкурсында еңеү һөҙөмтәһендә бәләбәйҙәр – күл янындағы “Йырсы шишмәләр” яңыртылған парк, ә 2023 йылда “Иҫке ҡала” үҙәге һәм Совет урамы эргәһендәге киңлек алды. Квартал биләмәһендә йәйәү йөрөү өсөн йәмғеһе 20-нән ашыу мәҙәни мираҫ объекты урынлашҡан. Улар араһында - Екатерина Великая заманындағы төрмә, сауҙа рәттәре, земство идаралығы бинаһы, Михаил Архангел сиркәүе һәм башҡалар. Ошонда уҡ мәғариф һәм һаулыҡ һаҡлау учреждениелары урынлашҡан. Бәләбәйҙең тарихи үҙәген төҙөкләндереү концепцияһын Башҡортостан ҡалаларын һәм ауылдарын үҫтереү институты һәм “Оркестра Дизайн” архитектура студияһы, урындағы хакимиәт белгестәре урындағы халыҡ фекерен иҫәпкә алып әҙерләгән. Төҙөкләндереү проекты сиктәрендә бында ҡоймалар алып ташланған, Төрмә һарайы майҙанында Себер тракты иҫтәлегенә ҡайындар ултыртылған, ҡала локациялары тарихи маршрутҡа берләштерелгән. Үҙәк биләмәһендә ижади йәштәр өсөн аралашыу урыны, балалар һәм спорт зоналары, ҡоро фонтан барлыҡҡа килде. Майҙанды ирекле планлаштырыу һәм ял итеү өсөн күп һанлы урындар йылдың теләһә ниндәй миҙгелендә төрлө йәштәге төркөмдәр өсөн киңлекте файҙаланыу мөмкинлеге бирә. Башҡортостан Башлығы Радий Хәбиров “Иҫке ҡала” үҙәге биләмәһен ҡарап сыҡты һәм журналистар менән әңгәмәлә республикала йәшәүселәрҙең төҙөкләндереү өсөн йәмәғәт урындарын һайлауҙа ҡатнашыуының мөһимлеген һыҙыҡ өҫтөнә алды. – Бында башҡараһы эштәр байтаҡ әле. Бәләбәй федераль программала ҡатнашыуын дауам итә, бәләкәй ҡалаларҙа һәм тарихи биләмәләрҙә уңайлы ҡала мөхите булдырыу өсөн Бөтә Рәсәй иң яҡшы проекттар конкурсына өсөнсө объект менән ғариза бирҙек, - тип һөйләне Радий Хәбиров. - Башҡортостан - отҡан гранттар һәм ҡалаларҙа, ауылдарҙа ремонтланған мәҙәни үҙәктәр һаны буйынса ил төбәктәре араһында тәүге өсәү иҫәбендә. Артабан да конкурста әүҙем ҡатнашасаҡбыҙ. Республика етәксеһе Радий Хәбиров Бәләбәйҙә Марс Әмиров бульварының һәм уның эргәһендәге киңлектәрҙең биләмәһен дә ҡараны. Башланғыс бәләкәй ҡалаларҙа һәм тарихи биләмәләрҙә уңайлы ҡала мөхите булдырыу буйынса Бөтә Рәсәй конкурсында ҡатнаша, уға 2024 йылдың авгусында йомғаҡ яһала. Муниципалитеттың баш архитекторы Айгөл Иванова бульвар Бәләбәйҙәге берҙән-бер йәйәүлеләр урамы булыуын хәбәр итте. Ул ҡала үҫешенә тос өлөш индергән Бәләбәйҙең “Автонормаль” заводының беренсе директоры Марс Әмиров хөрмәтенә аталған. Торлаҡ йорттар эргәһендә урынлашҡан бульварҙа - йәйәүлеләр өсөн ҙур трафик, ә Мәҙәниәт һарайы алдындағы майҙанда күмәк кеше ҡатнашлығында төрлө саралар, концерттар үтә. Бәләбәйҙең тарихи үҙәген төҙөкләндереү концепцияһын Башҡортостан ҡалаларын һәм ауылдарын үҫтереү институты, урындағы халыҡтың фекерен иҫәпкә алып “Аффинум” проект компанияһы белгестәре әҙерләгән. Проект бульварҙы уңайлы ял зоналары, йәйәү йөрөү маршруттары, велосипед юлдары, башҡа заманса элементтар менән тултырыуҙы күҙ уңында тота. Шулай уҡ Мәҙәниәт һарайы алдындағы майҙансыҡ төҙөкләндерелә. Фото: Башҡортостан Башлығы сайты.