Дыуан районының Арый ауылында тырышып донъя көткәндәр аҙ түгел. Беҙгә уларҙың береһе Зөлхизә Мөхәмәҙиева менән танышыу фосаты тейҙе. Беҙ барғанда ул башын да күтәрмәй баҡсаһында эшләп йөрөй ине. Йыл көйһөҙ генә килһә лә, йәшелсәләре, сәскәләре матур ғына үҫеп ултыра. Үҙенән артҡан помидор үҫентеләрен район үҙәгенә алып барып та һата. Үҙе машина йөрөткәс, был уға бер мәшәҡәт тыуҙырмай. Йәшелсәләргә ул тәбиғи ашлама ҡуллана. Уларҙың береһен беҙгә лә һөйләне. -Кесерткән, аҡтамыр, бәпембә кеүек төрлө үләндәрҙе йыям да феләккә тултырып өҫтөнә һыу ҡоям. Йылы урында ултыра. Әсей башлағас, 1 литр әсеткене 1 биҙрә йылы һыуға ҡушып помидор, боростарға һибәм, – тигән кәңәштәрен әйтте. Зөлхизә Ғизетдин ҡыҙының тағы ла бер һөнәре бар – ул тегергә ярата. Һөнәре буйынса тегенсе булыуы ла юҡҡа түгел. Ғөмүмән, был ҡыҙыҡһыныуы ла бала саҡтан. -Мәктәптә уҡығанда әсәйемдең һандығынан туҡыма алып үҙемә күлдәк, юбкалар тегеп кейә инем. “Нишләп туҡыманы һорамай алдың” тип әсәйем бер ҡасан да әрләмәне, – ти. Әле теккән ҡорама юрғандары, башҡа ҡул эштәре өйөнә йәм, биҙәк өҫтәй. Артабан да уға ҡулынан һөйөнөп йәшәргә яҙһын. Автор фотолары.