Реабилитациянан һуң яңынан сафҡа баҫасаҡмын

19 майҙан 20-һенә ҡарай төндә махсус хәрби операцияла хәрби задание үтәгәндә Башҡортостан Дәүләт Йыйылышы – Ҡоролтай депутаты Алексей Локотченко яраланыуы тураһында яҙғайныҡ инде. Әлеге мәлдә депутат һауыға башлаған, социаль селтәрҙәге сәхифәһендә үҙе ошо хаҡта хәбәр итте. “Һаумыһығыҙ, ҡәҙерле дуҫтар! Ниһайәт, хәрби задание үтәгәндә алған яранан һуң үҙемде яҡшыраҡ тойҙом, хәҙер телефонға ҡул етте, бәйләнешкә сыға алам. Телефонды ҡулыма алғас, минең адресыма йөҙләгән шылтыратыуҙар һәм смс-хәбәрҙәр күрҙем, уларҙағы һеҙҙең изге теләктәр миңә ярҙам итә, шылтыратыуҙар әле лә килә. Ҡыҙыҡһынған һәм борсолған һәр кемгә рәхмәт һәм яуап бирергә тырышам. Миңә ярсыҡтарҙы алып ташлау буйынса операция яһағанда хәрби табиптар тырышлығы менән үҙемде яҡшыраҡ тоям. Күпселек ярсыҡтарҙы алып ташланылар, ә ҡалғандары иһә мәңгегә махсус хәрби операцияла ҡатнашыусыларҙы берләштергән бурыс тойғоһо тураһында иҫкәртеп тороп ҡала. Айырым ярҙам өсөн ғаиләмә, Башҡортостан Республикаһы Дәүләт Йыйылышы – Ҡоролтай Рәйесе Константин Борисович Толкачевҡа һәм минең комитет рәйесе Фәрит Риф улы Ғүмәровҡа рәхмәт белдерәм. Реабилитациянан һуң хәрби заданиеларҙы үтәү өсөн яңынан сафҡа баҫасаҡмын. Еңеү беҙҙеке буласаҡ!” – тип белдерҙе госпиталдә дауаланған депутат. Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19 телефондары аша, “Минең документтарым” күп функциялы үҙәктең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ. Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Фото: Алексей Локотченконың “Бәйләнештә” төркөмөндәге видеоҙманан скриншот.