Радий Хәбиров - Стәрлетамаҡта

Бөгөн, 31 майҙа, Башҡортостан Башлығы Радий Хәбиров эш сәфәре менән Стәрлетамаҡта булды. Етәксе бер нисә сәнәғәт производствоһын ҡараны, шулай уҡ предприятие етәкселеге менән уларҙы үҫтереү мәсьәләләрен тикшерҙе. – Стәрлетамаҡ-Салауат-Ишембай агломерацияһы – Башҡортостандың иң эре сәнәғәт үҙәктәренең береһе. Беҙгә бында ҡуйылған бурыстарҙың барыһын да үтәү, яңы эш урындары булдырыу, муниципалитеттарҙың социаль өлкәһен үҫтереү мөһим, – тип билдәләне Радий Хәбиров социаль селтәрҙәге яҙмаһында. Стәрлетамаҡта Башҡортостан Башлығы “Шихан” һыра ҡайнатыу заводының етештереү майҙансығында булды (“Берләшкән һыра ҡайнатыу заводтары” холдингына инә). Быйыл предприятиеға 40 йыл тула, ул Рәсәй баҙары өсөн киң продукция ассортиментын сығара. Төбәк етәксеһе төрлө эсемлектәр әҙерләү технологияһы менән танышты, шулай уҡ уны “Берләшкән һыра ҡайнатыу заводтары” холдингы етәкселеге менән үҫтереү пландарын тикшерҙе. Холдинг президенты Ораз Дуардыев ғәмәлдәге производствоны яңыртыу пландары хаҡында һөйләне. Был продукция сығарыу күләмен арттырырға һәм уның ассортиментын киңәйтергә мөмкинлек бирәсәк. Һүҙ цехтарҙы һәм келәт биналарын ремонтлау, технологик ҡорамалдарҙы яңыртыу, яңы ҡойоу һәм төрөү линияларын сафҡа индереү хаҡында бара. Шуға бәйле сеймал һатып алыу күләмен дә арттырыу зарур. Уны республика агропредприятиеларынан һатып алыу отошло булыр ине. Башҡортостан Башлығы тәҡдим ителгән инвестиция проекттарын хупланы һәм республикала ошондай башланғыстарға булышлыҡ итеү сараларының киң комплексы эшләй тип билдәләне. – “Шихан” предприятиеһы республикала һәм унан ситтә лә күптән билдәле. Был – һәйбәт, ҡеүәтле производство, – тине Радий Хәбиров. – Яңы милексенең завод ҡеүәтен арттырырға, шулай уҡ беҙҙән арпа һатып алырға йыйыныуы мөһим. Үҙ сиратыбыҙҙа беҙ ҙә холдингының пландарын һәм предприятиены үҫтереүҙе хупларға әҙер. Башҡортостан Башлығы Стәрлетамаҡтың “Красный пролетарий” предприятиеһында ла булды. Был - нефть промыслаһы ҡорамалдарын, шулай уҡ сәнәғәттең төрлө тармаҡтары өсөн башҡа агрегаттар етештереүсе иң эре предприятиеларҙың береһе. Радий Хәбиров заводтың етештереү майҙансыҡтарын ҡараны һәм уны артабан үҫтереү пландары менән танышты. Предприятиеның генераль директоры Елена Нечепоренко 2023 йылда заводта яңы эшмәкәрлек йүнәлештәрен – сит ил двигателдәрен ремонтлауҙы, реверс-инжинирингты һәм импортты алмаштырыу программаһы сиктәрендә запас частар сығарыуҙы, дизель-генератор ҡулайламаларын етештереүҙе үҙләштереүҙәре хаҡында һөйләне. Шулай уҡ производствола деталдәрҙе газ-динамик өрҙөрөү алымы менән тергеҙеү участкаһы ойошторолдо, парониттан һәм резина-техник изделиеларҙан төрлө конфигурациялы изделиеларҙы бесеү өсөн һан менән программаланған идара итеү станоктары һатып алынды. Завод продукцияһы Рәсәйҙең һәм Белоруссияның алдынғы нефть-газ һәм машиналар эшләү компанияларына оҙатыла. Заказдар портфеле арҡаһында былтыр әҙер продукцияны һатыуҙан килгән килемдең 204 миллиондан 614 миллион һумға тиклем өсләтә артыуы теркәлгән. 2024 йылда предприятиела ҡеүәте 1,5 МВт тиклем булған газ поршенле электр станциялары һәм 100 тоннаға тиклем йөк күтәреүсән скважиналарҙы ремонтлау өсөн агрегаттар сығара башларға ниәтләйҙәр. Башҡортостан Башлығы Стәрлетамаҡ заводының йылдам үҫешен билдәләне. – Беҙ һәр ваҡыт “Красный пролетарий” заводына ярҙам иттек, уны заказдар менән тәьмин итеүҙә ярҙам иттек. Ростех Дәүләт корпорацияһы уны үҙ контурына алғанға тиклем предприятие бик үк яҡшы йәшәмәгән. Бөгөн завод бөтә йүнәлештәр буйынса эш менән тулы, бында бик әүҙем етәксе, – тине Радий Хәбиров. – “Красный пролетарий” йылдам үҫешә, уның киләсәге һәйбәт тип иҫәпләйем. Фото: Башҡортостан Башлығы сайты.