Өфөгә иң шәп, иң матур ғаиләләр йыйылды

“Был беҙҙең ғаиләнеке” конкурсы – “Рәсәй – мөмкинлектәр иле” президент платформаһының иң билдәле проекттарының береһе. Бәйгегә илдең 89 төбәгенән 587 250 кешенән торған 102 735 ғаилә командаһынан ғариза алынған. Ғаилә командаһына берләшкән кешеләр, йәғни туғандар йәмғеһе 81 илдә йәшәй. Конкурсты ойоштороусы – “Рәсәй – мөмкинлектәр иле” коммерцияға ҡарамаған автономиялы ойошмаһы. 2023 йылдың сентябрендә дәүләт башлығы ғаилә проектын тормошҡа ашыра башлау хаҡында иғлан итте. Быйыл 23 ғинуарҙа Ғаилә йылын асыу айҡанлы тантанала Владимир Путин: - Былтыр 1 сентябрҙә ошо конкурс тураһында иғлан иткән саҡта уҡ уның бик популяр булырын күҙаллағайным. Шулай булып сыҡты ла: 600 меңгә яҡын, йәғни ярты миллиондан ашыу кеше ҡатнашырға теләк белдерҙе. Формат уңышлы килеп сыҡты, шуға күрә ҙур ҡыҙыҡһыныу тыуҙырҙы. Бында бөтә быуын ғаилә ағзалары ҡатнаша, конкурстың маҡсаты ғаиләне берләштереүгә нигеҙләнгән, - тип билдәләне. Бөгөн, 30 майҙа, Өфөлә Волга буйы федераль округы ғаиләләре араһында “Был беҙҙең ғаиләлә” конкурсының округ ярымфиналы тантаналы асылды. 2 июнгә тиклем дауам итәсәк бәйгелә Волга буйы федераль округы төбәктәренән дистанциялы этапты уңышлы үтеп, ярымфиналға сыҡҡан ғаиләләр ҡатнаша. Ярымфиналды асыу тантанаһында сәләмләү һүҙе менән Рәсәй Федерацияһы Президентының Волга буйы федераль округындағы тулы хоҡуҡлы вәкиле урынбаҫары Олег Машковцев, Башҡортостан Республикаһы Хөкүмәте Премьер-министры Андрей Назаров һәм «Рәсәй – мөмкинлектәр иле» коммерцияға ҡарамаған автономиялы ойошмаһының генераль директоры урынбаҫары Оксана Ачкасова сығыш яһаны. Олег Машковцев ғаиләнең бөтә быуындарын берләштергән ошондай конкурсҡа ихтыяждың күптән булыуы хаҡында әйтте. - Илебеҙҙә ғаиләләр ҡатнашлығында төрлө саралар уҙа, әммә бындай күләмдәге конкурс бер ҡасан да үткәрелгәне булманы. Рәсәй Президенты Владимир Путин “Был беҙҙең ғаиләнеке” конкурсы хаҡында иғлан иткәндә «Рәсәй - мөмкинлектәр иле» платформаһының был проектының халыҡсан сараға әйләнәсәгенә ныҡлы ышаныс белдергәйне. Беҙҙең федераль округтан ғына 120 меңдән ашыу кеше – 20 мең самаһы команда заявка биргән. Был башҡа федераль округтарға ҡарағанда күберәк. Ярымфиналсыларға уңыштар теләйем һәм шуны өйтергә теләйем: һеҙ – әле үк еңеүселәр, - тине конкурсты асыу тантанаһында Олег Машковцев. Республика Хөкүмәте Премьер-министры ла Өфөлә үткән ярымфиналға килгән бөтә ғаиләләр ҙә еңеүгә лайыҡ, тип билдәләне. - Рәсәй Президенты Владимир Путин ғаиләләргә ярҙам итеүгә ҙур иғтибар бүлә, һәм “Был беҙҙең ғаиләнеке” конкурсы быны тағы ла бер тапҡыр раҫлай. Беҙҙә, Волга буйында, ғәҙәттәгесә күп балалы күп быуынлы ғаиләләр йәшәй, улар ғаилә ҡиммәттәрен хөрмәт итә һәм ата-әсәләренән ошо изге төшөнсәләрҙе балаларына тапшыра, - тине Андрей Назаров. - “Был беҙҙең ғаиләнеке” конкурсының финалы яҡынлашҡандан-яҡынлаша бара, бөгөн һуңғы округ ярымфиналы үтә. Үҙәк, Төньяҡ-Көнбайыш, Себер, Урал, Алыҫ Көнсығыш, Көньяҡ һәм Төньяҡ Кавказ федераль округтары, шулай уҡ илдең яңы төбәктәре ғаиләләре өсөн саралар үтте лә инде. Бөгөн майҙансыҡта Волга буйының 400-гә яҡын командаһы йыйылды, улар араһында кондитер фабрикаһы хужалары, транспортсылар династиялары, төҙөүселәр, уҡытыусылар, 40, 50 һәм хатта 70 йыл бергә ғүмер иткән ғаиләләр бар! Уларҙың барыһын да традицион ҡиммәттәргә бирелгәнлек һәм ғаилә хәтерен быуындан-быуынға тапшырыу теләге берләштерә, - тип билдәләне Оксана Ачкасова. Шулай итеп дүрт көн дауамында Волга буйы федераль округының 14 төбәгенән ғаиләләр финалға сығыу хоҡуғы өсөн ярыш башланы. Башҡортостан Республикаһынан - 51 команда, Пермь крайынан һәм Удмурт Республикаһынан - 43-әр, Түбәнге Новгород өлкәһенән - 38, Һамар өлкәһенән - 35, Татарстан Республикаһынан - 29, Пенза өлкәһенән - 27, Киров өлкәһенән - 22, Ырымбур өлкәһенән - 19, Ульяновск өлкәһенән - 16, Сыуашстан Республикаһынан - 14, Мари Иле Республикаһы - 12, Һарытау өлкәһенән - 11, Мордовия Республикаһынан 8 ғаилә бар. Ярымфиналда бөтәһе 1912 кеше ҡатнаша, улар араһында 713 бала, 656 ата-әсә, 439 өләсәй-олатай, алты ҡарт өләсәй менән ҡарт олатай бар. Ярымфиналдың иң йәш ҡатнашыусыһына - 5 йәш, ә иң өлкәненә - 92 йәш. Ғаилә командалары өсөн 31 майҙа һәм 1 июндә баһалау этаптары уҙа. Улар интеллектуаль, спорт, ижади эштәргә ҡағылышлы һынауҙарҙы үтергә тейеш. Бәйгеселәргә үҙ һәләттәрен генә түгел, ә балаларҙың һәм ата-әсәләрҙең бер-береһен ни тиклем яҡшы белеүен һәм командала эшләй алыуын күрһәтергә кәрәк. 2 июндә еңеүсе ғаиләләр иғлан ителәсәк. Шулай уҡ ҡатнашыусыларҙы лекциялар һәм оҫталыҡ дәрестәре, асыҡ дискуссиялар, осрашыуҙар, концерт программаһы, спорт уйындары һәм башҡа әүҙемлектәр көтә. Ғаилә йылына арналған конкурстың төп еңеүселәре 8 июлдә – Ғаилә, мөхәббәт һәм тоғролоҡ көнөндә билдәле буласаҡ. Айрат Нурмөхәмәтов фотолары.