Ҡайһы бер баҫмалар быйыл Мәсетле районында һабантуй булмай тигән яңылыҡ таратты. Әммә был яңылыҡ дөрөҫлөккө тура килмәй: һабантуй буласаҡ, әммә яңы форматта. Район хакимиәте был хаҡта дөрөҫ мәғлүмәт бирҙе. “Хөрмәтле яҡташтар! Быйыл һабантуй яңы форматта уҙғарыла. 12 июндә, Рәсәй көнөндә, үҙәк майҙанда яҙғы баҫыу эштәре барышында үҙен күрһәткән иң яҡшы хеҙмәткәрҙәрҙе тәбрикләү тантанаһы үтә. Бынан тыш, художестволы үҙешмәкәрлек артистары ҡатнашлығында патриотик концерт, шулай уҡ төрлө конкурстар, спорт ярыштары һәм уйын программалары ойоштороласаҡ. Райондың күпселек ауыл биләмәләрендә махсус хәрби операция зонаһында булған егеттәр өсөн ҡорбан салыу һәм күмәкләп доға ҡылыу ойошторола. Саралар графигы: Абдулла ауылы советы, 16 июндә – Абдулла ауылы мәсетендә ҡорбан байрамы; Әләгәҙ ауылы советы, 22 июндә – Майҙанда һәм мәсеттә Хәтер һәм ҡайғы уртаҡлашыу көнө; Оло Аҡа ауылы советы, 22 июндә – Һабантуй яланында Ҡорбан байрамы; Оло Ыҡтамаҡ ауылы советы, 15 июндә – Әжекәй һәм Яңы Мөслим ауылдары мәсеттәрендә Ҡорбан байрамы; Дыуан-Мәсетле ауылы советы, 17 июндә – Дыуан-Мәсетле ауылы мәсетендә Ҡорбан байрамы; Ҡорғат ауылы советы, 15 июндә – һабантуй яланында Ҡорбан байрамы; Ләмәҙтамаҡ ауылы советы, 13 июлдә - Һабанаҡ ауылына Ҡошсо ырыуы йыйыны; Бәләкәй Ыҡтамаҡ ауылы советы – сәсеү эштәре йомғаҡтары буйынса "Ленин” ауыл хужалығы етештереү кооперативы алдынғыларын тәбрикләү (сәсеү эштәре тамамланғас); Яңы Мишәр ауылы советы, 22 июндә – Яңы Мишәр ауылы мәсетәндә Хәтер һәм ҡайғы уртаҡлашыу көнө; Яңы Яуыш ауылы советы, 16 июндә – Һабантуй яланында Ҡорбан байрамы; Ростов ауылы советы, 22 июндә – Теләш ауылы мәҙәниәт йортонда Тыныслыҡ өсөн ҡорбан салыу; Йонос ауылы советы, 21 июндә – Йонос ауылы мәсетендә Хәтер һәм ҡайғы уртаҡлашыу көнө. Спорт ярыштары киләһе урындарҙа үтәсәк: 8 июнь – футбол (“Атлант” стадионы) һәм волейбол (РМС спорт залы) буйынса район ярыштары; 12 июнь (үҙәк майҙанда) – армрестлинг (ир-егеттәр 70, 80 килограмға тиклем, ҡатын-ҡыҙҙар 70 килограмдан ашыу), гер спорты (70 килограмға тиклем һәм унан ашыуыраҡ ир-егеттәр) - судья Хаметов Р.И., мас-рестлинг (таяҡ-тартыу), (егеттәр, ҡыҙҙар, ир-егеттәр, ҡатын-ҡыҙҙар). Өҫтәл теннисы (РДК спорт залында): 2010 йылғы һәм унан кесерәк (ҡыҙҙар, малайҙар), 2006-2009 йылғы (ҡыҙҙар, егеттәр), 18 йәш һәм унан өлкәнерәк ир-егеттәр һәм ҡатын-ҡыҙҙар. Тулыраҡ мәғлүмәт өҫтәмә рәүештә биреләсәк", - тип яҙҙылар район хакимиәте сайтында. Был турала социаль селтәрҙә район хакимиәте башлығы Әнәс Әсәҙуллин да үҙ фекерен белдерҙе. “Ҡайһы бер киң матбуғат сараларында беҙҙең районда һабантуй булмай тигән яңылыҡ таратыла. Был дөрөҫ түгел. Һабантуй буласаҡ, тик яңы форматта. 12 июндә, Рәсәй көнөндә, үҙәк майҙанда баҫыу эшсәндәрен, ауыл хужалығы ветерандарын һәм хеҙмәт кешеләрен тәбрикләү тантанаһы үтә. Беҙҙең районды, республиканы үҫтереүселәрҙең һәм махсус хәрби операцияның тылын тәьмин итеүселәрҙең барыһын да. Бынан тыш, художестволы үҙешмәкәрлек артистары ҡатнашлығында патриотик концерт, шулай уҡ төрлө конкурстар, спорт ярыштары һәм уйын программалары ойоштороласаҡ. Саралар планы менән тулыраҡ мәғлүмәт өҫтәмә рәүештә биреләсәк”, – тип яҙҙы ул. Фото: Мәсетле районы хакимиәте.