Өфө студенттары - Бөтә Рәсәй Хакатон ярышы еңеүселәре

Өфөләге Вуз-ара кампус резиденты вәкилдәре Түбәнге Новгородта “Рәсәй сәнәғәтенең һанлы индустрияһы” Бөтә Рәсәй конференцияһы сиктәрендә үткән «НЕЙМАРК.Хакатон IT-марафонында ҡатнашты. 13 төбәктән 70-тән артыҡ студент һәм “Фән һәм университеттар” милли проектының “Заманса кампус тармаҡтарын булдырыу” федераль программаһына ҡушылырға теләүселәр, өс көн буйы 10 командаға бүленеп, кампустың идеаль университет моделен булдырыу идеяһы өҫтөндә эшләне. Унда Башҡортостандан Өфө фән һәм технологиялар университетынан өс, Өфө дәүләт нефть техник университетынан ике студент ҡатнашты. Командалар һанлы сервистарға ярашлы кампустың идеаль университет моделен булдырыу, киңлек дизайны һәм административ хеҙмәттәрҙе камиллаштырыу ҡарарҙары өҫтөндә эшләне. Перспективалы проекттар эшләүселәр эксперт компанияларҙан аҡсалата приз, шулай уҡ “Һанлы иҡтисад” АНО-һында стажировка үтеү, Positive Tech Day форумында ҡатнашыу хоҡуғы һәм белем алыу программаһын үтеүгә сертификат алды. Иваново, Түбәнге Новгород, Һамар, Силәбе өлкәләре, Башҡортостан Республикаһы һәм Кранодар крайы студенттарының йыйылма командаһы “Терра – киләсәк кампусы” проекты менән еңеү яуланы. Команда составында Өфө фән һәм технологиялар университеты студенты Эдгар Назыров ҡатнашты. Студенттар 300 мең һумлыҡ сертификат алды. Өфө дәүләт нефть техник университеты студенты Вадим Кәримов етәкселегендәге команда студенттың кампусҡа килгән мәленән һанлы эҙен иҫәпләүсе, сығарылыш студентының йомғаҡлау һөҙөмтәләре буйынса портретын төҙөүсе, эш биреүсегә автоматик рәүештә уның тураһында белешмә ебәреүсе һәм уға ярашлы вакансия һайлаусы яһалма интеллектты белем биреү мөхитендә ҡулланыу ҡарары өсөн 2-се урын алды һәм 200 мең һум күләмендә призға, шулай уҡ Рәсәй Фән министрлығынан Гран-при - Иннополис университетында уҡыуға һәм Digital Innopolis Days x AI IN.конференцияһында ҡатнашыуға сертификатҡа лайыҡ булды. Өфө дәүләт нефть техник университеты студенты Тимур Ғәбиҙуллин креатив идеяһы өсөн махсус бүләк алды. ӨФҺТУ-ның ике студенты – Алексей Анисимов һәм Даниил Кочнев – командалары 4, 5-се урындарҙа булды, уларға Юғары иҡтисад мәктәбендә өҫтәлмә белем алыу өсөн персональ сертификаттар бирелде.- - Хакатон юғары кимәлдә үтте һәм күп ыңғай тойғолар ҡалдырҙы. Беҙ үҙебеҙҙе күрһәтеп кенә ҡалманыҡ, ә бөтә илдән йыйылған студенттар менән тәжрибә лә уртаҡлаштыҡ, - тип тәьҫораттары менән бүлеште Вадим Кәримов. «НЕЙМАРК.Хакатон»-ды “Фән һәм университеттар” милли проектына ярашлы Рәсәй Фән һәм юғары белем биреү министрлығы, Нижегородка өлкәһе Хөкүмәте, вуз-ара «НЕЙМАРК» ИТ-кампусы берлектә ойошторҙо. Сығанаҡ һәм фото: https://pravitelstvorb.ru/news/23962/