Баҡсағыҙҙа әлегә тиклем шалҡан үҫтермәгән булһағыҙ, быйыл был файҙалы йәшелсәне үҫтерергә онотмағыҙ. Һирәк осрай торған глюкорафанин элементы күп булыу сәбәпле, шалҡанда шешкә һәм диабетҡа ҡаршы көслө сифат тупланған. Әфлисун, лимон һәм кәбеҫтәгә ҡарағанда, шалҡанда С витамины икеләтә артығыраҡ. Ә фосфор күләме буйынса ул редисканы һәм әсе торманы күпкә уҙҙыра. Кеше организмына кәрәкле минераль тоҙҙарға бай булыуы менән дә шалҡан бик файҙалы йәшелсә. Кальций – бөтә тереклек өсөн дә мөһим булған микроэлемент. Кеше организмында ул һөйәк туҡымаларының нигеҙен тәшкил итә, ферменттар эшсәнлеген арттыра, йөрәк-ҡан һәм нервы системаһындағы процесҡа тәьҫир итә. Организмға кальций шалҡан, кәбеҫтә, салат, селдерей, пастернак, әсе торма, кишер, сөгөлдөр, борсаҡ, фасоль, баклажан, ҡыяр кеүек күп төрлө йәшелсәләрҙән инә. Шуныһы мөһим: шалҡан файҙалы сифаттарын юғалтмайынса баҙҙа оҙаҡ һаҡлана. Уны үҫтергәндә күләгәрәк урынға ултыртып, күп итеп һыу һибергә кәңәш ителә. Фото һәм сығанаҡ: "Авыл хатыны. Сельчанка" төркөмөнән.