“Йөрәгемә бөтә донъя һыйҙы...”

Китап байрамы сиктәрендә Рәшит Назаровтың яҡташтары менән түңәрәк өҫтәл шағирҙың тыуыуына 80 йыл тулыуға арналды. Секундҡа мәңгелек һыйһын, Нөктәгә – бөтә ғаләм, Гел изге ялҡын дөрләһен, Бирегеҙ миңә ҡәләм! Был шиғыр юлдары Рәшит Назаровтың “Бирегеҙ!” тигән шиғырынан. Эйе, шағирҙың ҡыҫҡа ғына ғүмере эсенә һыйған ялҡынлы йөрәге лә, тап ошо шиғырҙағы кеүек, тик изгелек һәм яҡтылыҡ менән дөрләп янды. Беребеҙгә лә сер түгел, шағирҙың үҫе иҫән сағында ла, хәҙер ҙә шиғриәтен барыбыҙ ҙа яратабыҙ, әммә уға ваҡытында етерлек иғтибар булманы. Уның шиғриәтенең ҡиммәте баһалап бөткәһәҙ, ул беҙҙе гел юғарылыҡҡа әйҙәне, башҡорт әҙәбиәте тарихында үҙенең һүҙен, фекерен, үҙенсәлекле тел байлығын мәңгелеккә уйып ҡалдырҙы. Ә иһә бөгөн шағирҙың ижадына һәм хәтеренә иғтибар һәм ихтирам күрһәткән замандаштарыбыҙ уның исемен мәңгеләштереү өсөн бик күп эштәр башҡара. Күптән түгел уның тыуған яғында бюст асылғайны, бөгөн инде шағирҙың ҡәләмдәштәре, ижадын өйрәнеүселәр һәм яҡташтары түңәрәк өҫтәлгә йыйылды. Сараны Милли әҙәбиәт музейы ойошторҙо һәм уның директоры Миләүшә Ҡаһарманова, Яҙыусылар союзы рәйесе Айгиз Баймөхәмәтов һәм башҡа шағир-яҙыусылар, йәмәғәт эшмәкәрҙәре ҡатнашты. Айгиз Ғиззәт улы Рәшит Назаров шәхесенең ниндәй юғарылыҡта торғанын, уның башҡорт шиғриәтенә биргән ҡабатланмаҫ һүҙ байлығын һәм уның яҡты хәтерен мәңгеләштереү буйынса алда тағы ла ҙурыраҡ эштәр тороуын бәйән итте. Түңәрәк өҫтәлдә шағирҙың яҡташтары, Башҡортостандың атҡаҙанған ауыл хужалығы хеҙмәткәре Миҙхәт Хәбибулла улы Вәлитов, Рәшит Назаров исемендәге Талбазы башҡорт гимназияһы директоры Светлана Рәшит ҡыҙы Юлмөхәмәтова шағирҙың ижади байлығын төрлө телдәргә тәржемә итеү һәм уның исемен күтәреү йәһәтенән маҡсатлы эштәр алып барған, әҙәби мираҫын тыуған ауылы Төрөмбәттән барып алып Тарих, тел һәм әҙәбиәт институты архивына тапшырған, ҙур эштәр башҡарған яҙыусыларға һәм дә Яҙыусылар союзының етәкселегенә рәхмәт белдерҙе. Был түңәрәк өҫтәлдән барыһы ла был әле Рәшит Назаровтың исемен мәңгеләштереү эштәренең башы ғына булыуына, киләсәктә уның шиғриәте маяҡ булып барыһын да алға әйҙәйәсәгенә ышанып таралышты. Фото: Динар Кәлимуллин.