Йыш ҡына “Хәҙер ауылдар ҡартая” тигән һүҙҙәрҙе ишетәбеҙ, шуға күрә хеҙмәт командировкаһы менән берәй төбәккә барһаҡ, йәш ғаиләләр тураһында ҡыҙыҡһынабыҙ. Ғафури районының Имәндәш ауылына барғас та шулай булды. “Ауыл ситендә ап-аҡ, ҙур йортто күрерһегеҙ. Эргә-тирәһен төрлө техника уратып алған. Унда уңған йәштәр йәшәй”, – тинеләр. Уҡлыҡая ҡаршыға күренеп торған ерҙә генә йәш ғаиләнең йорт-ҡураһы. Ысынлап та, өй тирәһендә балалар өсөн дә, өлкәндәр өсөн дә ауыл ерендә кәрәкле техника йыйылған ине. Ул арала тәҙрәнән беҙҙе күҙәтеп торған хужабикә лә күренде. “Әйҙәгеҙ бында”, – тип йылмайҙы ихлас ҡатын һәм өйөнә саҡырҙы. Был Илмира менән Айнур Зәйнәшевтәрҙең йорто булып сыҡты. Өйҙә беҙҙе Әлфинә, Динә исемле ҡыҙҙар һәм өлкән апаһы ҡулындағы ете айлыҡ Аяз ҡаршыланы. Бәләкәс малай башта беҙгә бик һынап, шикләнеп, текләп ҡараны, таныш һыҙаттарҙы эҙләне, күрәһең. – Ирем таң менән хужалыҡ эштәре менән юлланғайны шул. Әле – эштең бик ҡыҙыу мәле, ғөмүмән, ауыл ерендә төрлө мәшәҡәт күп инде, – тине ул. – Айбулат менән Алтынай – үҙебеҙҙең ауылдағы балалар баҡсаһында. Икеһе лә кинәнеп йөрөй, тиҫтерҙәре менән аралашырға ярата. Ул арала кескәй Аяз беҙҙе яҡын күрә башланы, йөҙөндә йылмайыу билдәләре балҡыны, хатта әкренләп беҙгә ҡарай тартылды. - Улым Аяз менән әлегә бала ҡарау буйынса ялдамын. Өлкән ҡыҙҙарым яңыраҡ мәктәптән ҡайтты, – тине күп балалы әсә. Илмира ла, уның ире Айнур ҙа эргәләге Ташаҫты ауылынан. Йәштәр, өйләнешкәс, тыуған ерҙәренә алыҫ китмәй йәшәүҙе хуп күргән. Хәҙер улар ҙур йорт һалып сыҡҡан. Төп байлыҡтары иһә биш балалары: өс ҡыҙ һәм ике малай буй еткерә ишле ғаиләлә. Уңған хужабикә менән тырыш хужа үҙҙәре лә күп балалы ғаиләлә үҫкән. Илмира менән Айнур Зәйнәшевтәр күпләп мал – һигеҙ һыйыр, алты башмаҡ, һарыҡтар һәм ҡош-ҡорт тота. Ғаилә башлығы һөт йыйыу менән шөғөлләнә, үҙҙәре лә артып ҡалған һөттө тапшыралар. Илмира Шакир ҡыҙы ауылдағы балалар баҡсаһында тәрбиәсе булып эшләгән. Ул Башҡорт дәүләт университетының Стәрлетамаҡтағы филиалын, М. Аҡмулла исемендәге Башҡорт дәүләт педагогия университетын тамамлаған. Зәйнәшевтәрҙең өлкән ҡыҙҙары – ата-әсәһенең ярҙамсыһы. Иң бәләкәс туғандары Аязды ҡарашырға, унан өлкәнерәктәренә күҙ-ҡолаҡ булырға өлгөрәләр. Әлфинә – Имәндәш урта мәктәбендә VI класта, унан кесерәге Динә ошо уҡ белем усағында IV класты тамамланы. Ҡыҙҙарҙың икеһе лә “бишле” билдәләренә генә өлгәшә. Өлкәне волейбол уйнарға ярата, һеңлеһе китап уҡырға, һүрәт төшөрөргә әүәҫ. Айбулатҡа балалар баҡсаһына йөрөү оҡшай. Алтынайға әле ни бары өс йәш, тиҫтерҙәре менән уйнарға ярата. Аяз иһә мәктәпкә һәм балалар баҡсаһына киткән апайҙарын һәм ағаһын көтөп ала. Илмира менән Айнур Зәйнәшевтәр “Табын-фест” йәштәр фестивалендә “Табын ырыуының өлгөлө ғаиләһе” номинацияһында еңеүсе тип танылған. “Күркәм ғаилә ниндәй була?” тип һораһалар, “Зәйнәшевтәр кеүек”, – тип яуап бирер инек. Үҙҙәренең ҡулынан килгәнсә тырышып-тырмашып, күп бала бағып йәшәй улар. Фото: Зәйнәшевтәрҙең ғаилә архивынан.