Баш ҡалабыҙҙа барған Китап байрамы ысын мәғәнәһендә халыҡтар дуҫлығына дәлил. Бөгөн дә бында төрлө милләт вәкилдәре осраша, милли әҙәбиәттәр менән таныша, өй китапханаһын төрлө йөкмәткеле баҫмалар менән тулыландыра. Бөгөн бында "Берҙәмлектә - көс" тигән баш аҫтында әҙәби уҡыуҙар ҙа үтте. Сарала Рәсай, Ҡаҙағстан, Беларусь, Әзербайжан һәм Фәләстан әҙиптәре туған телдәрендә, шулай уҡ башҡа телдәрҙән тәржемә ителгән шиғырҙарын уҡыны.Башҡортостан Яҙыусылар союзы рәйесе урынбаҫары Тәнзилә Дәүләбирҙина белорус яҙыусыларының башҡорт теленә тәржемә ителгән әҫәрҙәренән торған антология баҫылып сығыуы хаҡында хәбәр итте. Әле хәҙерге башҡорт әҙәбиәтенең белорус телендәге антологияһын баҫмаға әҙерләү бара. Фото: resbash.ru