Зариф Байғусҡаров милли баҫмалар яҙмышына битараф түгел

Өфөлә “Китап байрамы” халыҡ-ара китап йәрминкәһендә ойошторолған “Изге эштәр” акцияһына Дәүләт Думаһы депутаты Зариф Закир улы Байғусҡаров һәм уның тормош иптәше “Тамыр” телеканалы директоры Гөлназ Фәрит ҡыҙы Ҡолһарина ҡушылды. – “Китап байрамы”ның әһәмиәте ҙур. Һуңғы йылдарҙа китапҡа ҡараш үҙгәрҙе, китап уҡыусылар аҙайҙы. Был дөрөҫ түгел, сөнки китап уҡыуға бер нәмә лә етмәй. Китап уҡыған кеше һәләтле, белемле, киң ҡарашлы, мәғлүмәтле була. Йәрминкәлә төрлө уҡыусыға тәғәйенләнгән әҫәрҙәр тәҡдим итәләр – был бик яҡшы күренеш. Беҙ ҙә һәр ваҡыт ошо сараға килеп, ғаиләбеҙгә китап алабыҙ. “Изге эштәр” акцияһына килгәндә, бик яҡшы сара, тип әйтер инем, сөнки һуңғы йылдарҙа гәзит-журналдарҙың тиражы кәмеп бара. Был иһә уларҙың бөтөү ҡурҡынысын тыуҙыра. Үҙебеҙҙең матбуғатты һаҡлап ҡалыу өсөн әүҙемлек күрһәтергә тейешбеҙ – һәр кеше үҙенең туғандарына, тыуған ауылына, мәктәбенә, мохтаждарға йәки башҡаларға гәзит-журналдарға яҙыла ала. “Изге эштәр” акцияһы бик матур ойошторолған, кешеләр яҙыла. Үҙем дә туҡтап, үҙебеҙҙең Күгәрсен районының Ҡалдар ауылы мәктәбенә, уҡыһындар, тип, “Башҡортостан” гәзитен һәм “Тамаша” журналын яҙҙырттым. Үҙем башҡортса сыҡҡан гәзит-журналдарға йыл һайын яҙылып торам. Шулай уҡ уларҙы мохтаждарға, махсус хәрби операцияла булған егеттәрҙең ғаиләләренә таратып торам. Милли матбуғатҡа беҙ алдырмаһаҡ, кем алдырыр?! Шуға ла башҡортса уҡыйыҡ, үҙебеҙҙең баҫмаларға яҙылайыҡ, – тине Зариф Байғусҡаров. Гөлназ Ҡолһарина “Тамыр” телеканалы өсөн “Тамаша” журналына һәм “Йәншишмә” гәзитенә яҙылды. Байғусҡаровтар ғаиләһенә “Изге эштәр” акицяһында ҡатнашҡандары һәм башҡаларға яҡшы өлгө күрһәткәндәре өсөн рәхмәт белдерәбеҙ. Иҫегеҙгә төшөрәбеҙ: Өфөлә “Китап байрамы” халыҡ-ара китап йәрминкәһендә Рәсәй почтаһы һәм “Башҡортостан Республикаһы” нәшриәт йорто дәүләт унитар предприятиеһы хеҙмәткәрҙәре ташламалы хаҡтар буйынса республика, район гәзиттәренә һәм журналдарға яҙылыуҙы ойоштора. Шулай уҡ унда “Изге подписка” акцияһы бара. Унда теләгән һәр кеше махсус хәрби операцияла ҡатнашҡандарҙың ғаиләһенә гәзит-журналдарға подписка бүләк итә ала. Рәмилә МУСИНА фотолары.