Бында иҡтисад та, үҫеш тә бар

Алдан хәбәр итеүебеҙсә, Башҡортостан Республикаһы Башлығы Хакимиәте етәксеһенең беренсе урынбаҫары Азат Бадранов эш сәфәре менән Хәйбулла районында булды. Ул үҙенең социаль селтәрҙәге сәхифәләренә түбәндәге посты яҙған. "Хәйбулла районы республиканың иң алыҫ райондарының береһе, далалы һәм сәнәғәтле. Бында иҡтисад та, үҫеш тә бар. Совет заманынан алып ер аҫтын файҙаланыусыларҙың эшмәкәрлеге урындағы парадигмаға индерелгән. Райондың «социалкаһы» күп осраҡта «таусылар» тарафынан хуплана һәм район хакимиәте улар менән һәр ваҡыт диалогта тора. Шуның менән бергә тау-мәғдән производствоһы менән бәйле проблемалар ҙа бар. Тәү сиратта был, әлбиттә, махсус техниканың урындағы юлдарға йоғонтоһо. Был мәсьәлә Ер аҫты байлыҡтарын файҙаланыу мәсьәләләре буйынса ведомство-ара комиссияның күсмә кәңәшмәһенең көн тәртибендә төп мәсьәлә булып торҙо. Аҡъярҙа барыһы менән дә конструктив һөйләшеү булды. Компаниялар иҫкәртмәләргә һәм тәнҡитте ҡабул итте, хәлде яҡшыртыу һәм килеп тыуған проблемаларҙы хәл итеү буйынса үҙ тәҡдимдәрен индерҙе. Атап әйткәндә, юлдарҙы һәм ремонтҡа мохтаж айырым участкаларҙы бергәләп тергеҙеү тураһында ҡарар ҡабул ителде. Шулай уҡ «Башҡорт баҡыры» яуаплылығы сикләнгән йәмғиәте Подольск ауылында ҙур инвестиция проектын ғәмәлгә ашырыу хаҡында хәбәр итте. Хәтерегеҙгә төшөрәм, 50 йыл элек был ауыл эргәһендә баҡыр рудаһының стратегик запастары табылды һәм шунан алып халыҡты күсереү кәрәклеге тураһында һөйләшеүҙәр алып барыла. Производство һәм иҡтисади йәһәттән күләмле проект булһа ла, социаль йәһәттән бик уҡ ҡатмарлы. Тәү сиратта урындағы халыҡ менән бер тапҡыр ғына түгел, ә йөҙөшәр һөйләшеү үткәрергә кәрәк булғанға күрә. Юҡҡа ғына халыҡ араһында, «күсеү - янғындан да яманыраҡ», тип әйтмәгәндәр бит. Иң мөһиме, был һөйләшеүҙәрҙә ике яҡ та бер-береһен ишетергә тейеш. Урындағы халыҡтың бөтә иҫкәртмәләре һәм тәҡдимдәренән һуң компания өс күсереү вариантын әҙерләне: 1) Аҡъярҙағы күп фатирлы йорттар, 2) Подольсктың яңы биҫтәһендәге йорттар, 3) Подольскиҙағы күсемһеҙ милекте һатып алыу. Әгәр тәүге ике вариант буйынса Аҡъярҙа «Башҡорт баҡыры»нан фатирҙарҙың яҡшы тип һанала, сөнки улар хеҙмәткәрҙәре өсөн ошондай йорттар төҙөгән дә инде, ә күсемһеҙ милекте һатып алыу хаҡы тураһында беҙгә түбәндәгеләрҙе аңлаттылар. Һәр осраҡта мәсьәлә индивидуаль ҡарала, торлаҡтың баҙар хаҡына бойондороҡһоҙ экспертиза үткәрелә, күрһәтелгән суммаға бер нисә коэффициент өҫтәлә һәм һатып алыу хаҡы килеп сыға. Миҫалдарҙың береһендә һөйләүҙәренсә, йортто баҙар хаҡы буйынса ике миллион һумға баһалағандар, ә бөтә коэффициенттар менән йомғаҡлау хаҡы биш миллион тәшкил иткән. Бындай һығылмалы алымдар арҡаһында Подольск халҡын күсереү мәсьәләһендә киҫкенлек юҡтыр, тип уйлайым. Законлылыҡты һәм ғәҙеллекте тәьмин итеү - республика Башлығы Радий Хәбировтың ведомство-ара комиссия алдындағы ике төп талабы һәм Аҡъярҙағы ултырыш ҡуйылған бурыстарға яуап бирҙе", -тип яҙған Азат Бадранов. Фото: "Хәйбулла хәбәрҙәре" гәзитенән