III халыҡ-ара бизнес- шәрифтәр форумының төп темаһы: “Бизнес һәм власть. Һөҙөмтәле төбәк менән партнерлыҡта көслө эшҡыуар”. Бында дәүләт һәм бизнестың үҙ-ара килешеп эш итеүе өлкәһендә тәжрибә уртаҡлашыу, бәләкәй эшҡыуарлыҡтағы хәлде анализлау, бәләкәй һәм урта эшҡыуарлыҡ субъекттарына дәүләт ярҙамы сараларын күрһәтеү мәсьәләләре буйынса фекер алышынды, эшҡыуарҙарҙың тәжрибәләре күрһәтелде, спикерҙар сығыш яһаны. Башҡортостандың Эшҡыуарлыҡ һәм туризм министрлығы командаһы форумды аралашыу форматында ойошторҙо. Иң башта бизнес-шәрифтар араһында онлайн-код аша реаль ваҡыт режимында һорау алыу үткәрелде, унда эшҡыуарҙарға ярҙам сараларын мөһимлек буйынса бүлергә кәрәк ине. Иң ҙур ярҙам тип ҡатнашыусылар милекте (61%) - льготалы ҡуртымға биреү, бүлеп түләү шарты менән һатып алыу, бушлай файҙаланыуҙы иҫәпләй. Шулай уҡ бизнес-шәрифтар мәғлүмәти һәм хоҡуҡи ярҙам, персоналды уҡытыуҙы мөһим тип иҫәпләй. Башҡортостан Хөкүмәте Премьер-министрының беренсе урынбаҫары - иҡтисади үҫеш һәм инвестиция сәйәсәте министры Рөстәм Моратов һүҙҙәренсә, эшҡыуарҙарҙар менән ошондай бәйләнеш булмаһа, бизнес-шәрифтар институты булмай тороп, инвесторҙар менән ҙур системалы эш төҙөп булмаҫ ине. 5 йылда төп капиталға инвестициялар, 2023 йылда бығаса булмаған 620 миллиард һумға етеп, Башҡортостанда 53 процентҡа тиерлек артҡан. Башҡортостанда бизнесҡа ярҙам итеүҙең уңышлы практикаһы тураһында Башҡортостан Республикаһының эшҡыуарлыҡ һәм туризм министры Зөһрә Гордиенко һөйләне. Ул Башҡортостанда бәләкәй һәм урта эшҡыуарлыҡ субъекттарының һаны йыл һайын арта барыуын һәм 2024 йылдың дүрт айы йомғаҡтары буйынса 140,3 мең берәмеккә (5,6) етеүен билдәләне. Иҫегеҙгә төшөрәбеҙ, «Урал аръяғы-2024»VI Бөтә Рәсәй инвестиция һабантуйын ойоштороусылар булып Стратегик башланғыстар агентлығы һәм Башҡортостан Хөкүмәте сығыш яһай. Иҡтисади форумда шулай уҡ федераль һәм төбәк дәүләт учреждениелары, Рәсәй һәм сит ил компаниялары вәкилдәре, инвесторҙар, эксперттар, билдәле дәүләт һәм йәмәғәт эшмәкәрҙәре ҡатнашасаҡ. Фото: https://forum-zauralye.com/ru/n24-30