2024 йылда Башҡортостан мәктәптәрен бөтәһе 15,5 мең 11-се класс уҡыусыһы тамамлай, шул иҫәптән 4385-е - Өфөлә. Уҡыуҙы тамамлауҙары менән сығарылыш уҡыусыларын Башҡортостан Башлығы Радий Хәбиров ҡотланы. - Һеҙ оло тормошҡа аяҡ баҫаһығыҙ һәм үҙегеҙ өсөн үҙегеҙ яуап бирәһегеҙ, - тине ул. - Ошо ваҡыт эсендә ата-әсәләрегеҙ һәм уҡытыусыларығыҙ һеҙгә күберәк белем бирергә тырышты. Беҙҙең өсөн һеҙ мәңгелеккә иң аҡыллы һәм яратҡан балалар булып ҡаласаҡһығыҙ. Алда һеҙҙе дәүләт имтиханы көтә, унан һуң кемдер эшкә барасаҡ, ә кемдер уҡыуын дауам итәсәк. Уңыштар! Төбәк етәксеһе йәштәргә юғары уҡыу йорттарын тамамлағандан һуң тыуған республикаһына ҡайтыуҙарын теләне. Байрамды Рим Хәсәнов музыкаһына «Өфө йүкәләре» гранд-вальсы дауам итте. Сара Өфөнөң 450 йыллығына арналды. Уны бер үк ваҡытта дүрт мең 11-се класс уҡыусыһы башҡарҙы. Бынан тыш, сараны ойоштороусылар балалар өсөн концерт әҙерләгәйне. Фото: Башҡортостан Башлығы сайты.
Радий Хәбиров сығарылыш класы уҡыусыларын мәктәпте тамамлау менән ҡотланы
Около минуты
24 мая