Башҡортостанда Өфө – Инйәр – Белорет юлында “Хәүефһеҙ сифатлы юлдар” милли проекты сиктәрендә тимер юл аша юл үткәргесте ремонтлауҙы дауам иттеләр. 2023 йылда был объектта әҙерлек эштәре башҡарылған. Ә 2024 йылдың майында подрядсы ойошма ҡоролманың уң яғында деформация йөйҙәрен һала башланы. Бынан һуң гидроизоляция менән һаҡлағыс ҡатламдар һалыу һәм асфальт-бетон япмаһын яңыртыу буйынса эштәр башҡарыла. Шулай уҡ ремонт барышында барьер һәм яндауыр ҡоймаларын ҡуйыу күҙаллана. – Был юл үткәргес урынлашҡан Өфө - Инйәр - Белорет юлы Башҡортостан Республикаһы терәк селтәренең бер өлөшө булып тора. Был туристик йүнәлеш - туристарҙың яратҡан ял итеү урындарының береһе. Бында Инйәр Ирәкташын күрергә, “Абҙаҡ” тау саңғыһы курортында шыуырға, Атыш шарлауығын һәм башҡа ҡыҙыҡлы урындарҙы ҡарарға мөмкин. Тимер юл өҫтөндәге үткәргесте Белорет халҡы әүҙем файҙалана. Был ҡоролманы ремонтлау туристар өсөн дә, урындағы халыҡ өсөн дә хәүефһеҙ йөрөүҙе тәьмин итәсәк, – тине транспорт һәм юл хужалығы министры вазифаһын башҡарыусы Любовь Минакова. Ремонт ваҡытында юл күперендә иҫкәртеү билдәләре ҡуйылған, ә автомобиль хәрәкәтен светофорҙар көйләй. Водителдәргә был участканан үткәндә иғтибарлы булырға кәрәк. Ремонт эштәрен 2024 йылдың аҙағына тиклем тамамлау күҙаллана. “Хәүефһеҙ сифатлы юлдар” милли проекты (национальный проект "Безопасные качественные дороги") “2030 йылға тиклемге осорға Рәсәй Федерацияһын үҫтереүҙең милли маҡсаттары һәм стратегик бурыстары тураһында” ил Президенты Владимир Путиндың Указы положениеларын үтәү маҡсатында Рәсәйҙең Транспорт министрлығы тарафынан әҙерләнгән. Милли проекттың масштабы бөтә илде солғап ала, унда Рәсәйҙең 84 субъекты ҡатнаша. Фото: Юл һәм транспорт министрлығы.