Илзирә Ғарифуллина Фёдоровка районының Юлдаш ауылында күп балалы ғаиләлә тыуып үҫкән. Тыуған ауылында 9-сы класты тамамлағас, баш ҡалалағы Р. Ғарипов исемендәге Башҡорт республика гимназия-интернатында 10-11-се класта белем алған. “5-се кластан яҙышырға яраттым, мәҡәләләрем, шиғырҙарым “Йәншишмә” гәзитендә баҫылды. Журналист булыу теләгем ҙур ине, шуға күрә Башҡорт дәүләт университетының башҡорт филологияһы һәм журналистикаһы факультетына уҡырға индем һәм уны уңышлы тамамланым”, - ти ул. Ҡариҙел егете, эске эштәр бүлегендә эшләгән Илвир исемле егет менән татыу ғаилә ҡоралар. “Ҡыҙыбыҙ Эвелина тыуҙы һәм уны балалар баҡсаһына урынлаштырыу бик проблемалы булып сыҡты һәм миңә баш ҡаланың Дим районындағы 7-се башҡорт балалар баҡсаһына тәрбиәсе булып эшкә барырға тура килде, - ти Илзирә Ғарифуллина. – Икенсе улыбыҙ Сыңғыҙға ла балалар баҡсаһында урын булһын өсөн эшләүемде дауам иттем. Әлбиттә, унда үткәрелгән саралар тураһында “Йәншишмә” гәзитенә мәҡәләләр ебәреп торҙом”. 2017 йылдан Илзирә Ғарифуллина Өфөләге Дим районында урынлашҡан Рауил Бикбаев исемендәге 102-се башҡорт гимназияһында - педагог-китапханасы. Китапханала, гимназияла уҙған саралар тураһында “Йәншишмә” гәзитенә мәғлүмәттәр ебәреп тора. “Шулай уҡ гимназиябыҙҙың "Дуҫлыҡ" гәзитен айына бер тапҡыр сығарам һәм "Мәктәп радиоһы" түңәрәген етәкләйем. Дүрт уҡыусым, дикторҙарым, ике телдә мәғлүмәтте уҡып ишеттереп тора”, - ти Илзирә. Шулай итеп, ул бала саҡтан яратҡан һөнәре буйынса эшен дауам итә. Ире Илвир, хаҡлы ялға сығып, үҙ эше менән шөғөлләнә, ҡыҙҙары Ҡазан федераль университетында уҡыны, быйыл – магистратураны, ә улдары Өфө районының Жуков ауылында "Уңыш" мәктәбен тамамлай. Фотолар: Илзирә Ғарифуллинанң шәхси архивынан.