«Туғанлыҡ» фестивале еңеүселәрен бүләкләү тантанаһы уҙҙы

Аҙна дауамында Өфөнөң өс театрында Мәжит Ғафури исемендәге Башҡорт дәүләт академия драма театрының баш режиссеры Айрат Абушаһманов етәкселегендәге эксперттар советы 16 фестиваль спектаклен ҡараны. Иң яҡшы спектаклдәр һигеҙ төп номинацияла билдәләнде: «Милли классиканың заманса хәл ителеше» – Салауат башҡорт драма театрының «Ярлыҡау» спектакле (Башҡортостан); «Иң яҡшы аудиовизуаль хәл ителеш» – Ғәлиәскәр Камал исемендәге Татар дәүләт академия театрының «Көл» спектакле (Ҡазан, Татарстан); «Иң яҡшы музыкаль-пластик хәл ителеш» номинацияһында – Ғәбит Мүсирепов исемендәге Балалар һәм үҫмерҙәр өсөн ҡаҙаҡ академия театрының «Кулагер» спектакле (Алматы, Ҡаҙағстан); «Иң яҡшы ир-егет роле» - Бауырйән Нурмағанбәтов, Сәкен Сәйфуллин исемендәге Ҡарағанда өлкә академия ҡаҙаҡ драма театрының «Ҡарагүҙ» спектаклендә Нарш ролен башҡарғаны өсөн; «Иң яҡшы ҡатын-ҡыҙ роле» - Владимир Тхапсаев исемендәге Төньяҡ Осетия дәүләт академия драма театрының «Король Лир» спектаклендә Корделия/Шут ролен башҡарғаны өсөн Әминә Агкацева; «Икенсе пландағы иң яҡшы ҡатын-ҡыҙ роле» номинацияһында – Ҡасималы Жантошев исемендәге Ысыҡкүл өлкә музыка-драма театрының «Аҡ пароход» спектаклендә Бикәй роле өсөн Света Абдыҡадирова (Ҡараҡол, Ҡырғыҙстан); «Икенсе пландағы иң яҡшы ир-егет роле» номинацияһында – Владимир Тхапсаев исемендәге Төньяҡ Осетия дәүләт академия драма театрының «Король Лир» спектаклендә Эдмунд роле өсөн Аслан Тигиев (Владикавказ, Төньяҡ Осетия – Алания); Ике «Иң яҡшы режиссёр эше» призы – Степан Пектеев, М. Шкетан исемендәге Мари милли драма театрының (Марий Иле) «Иван Кырла. Тормошҡа юллама» спектакле һәм Уланмырҙа Ҡарыпбаев, Ҡасималы Жантошев исемендәге Ысыҡкүл өлкә музыка-драма театрының (Ҡырғыҙстан) «Аҡ пароход» спектакле өсөн. Танылған актерҙар ҡулынан махсус бүләк алыусылар: Уразғол образын сағыу һынландырғаны өсөн – Ҡасималы Жантошев исемендәге Ысыҡкүл өлкә музыка-драма театрының «Аҡ пароход» спектаклендә актёр Ҡанат Шабдалиев; Туғыҙаҡ милли героиня образын кәүҙәләндергәне өсөн – Әлмәт дәүләт татар драма театрының (Татарстан) «Алтынсәс. Мираҫ» спектаклендә актриса Мәҙинә Ғәйнуллина; Эльза образын үҙенсәлекле кәүҙәләндергәне өсөн – Мишши Сеспель исемендәге Сыуаш дәүләт йәш тамашасы театрының «Кәкүктең күҙ йәштәре» спектаклендә актриса Венера Пайгилдина; Бурёнкин образының тәрән психологизмы өсөн – Салауат башҡорт драма театрының «Ярлыҡау» спектаклендә актёр Яҡуп Шәрипов (Башҡортостан); Акан Сери образының поэтик һынландырылышы өсөн – Ғәбит Мүсирепов исемендәге Балалар һәм үҫмерҙәр өсөн ҡаҙаҡ академия театрының «Кулагер» спектаклендә актёр Асет Иманғәлиев (Алматы, Ҡаҙағстан); Сыңғыҙ Айытматов прозаһын үҙенсәлекле итеп еткергән өсөн – Әлимпаша Салауатов исемендәге Дағстан дәүләт ҡумыҡ музыкаль-драма театрының «Диңгеҙ ярын иңләй ала эт» спектакле (Махачкала, Дағстан); Рус классикаһына мөрәжәғәт иткән өсөн - Самсон Чанба исемендәге Абхазия дәүләт драма театрының «Ловелас» спектакле (Сухум, Абхазия); Ҡарагүҙ образын талантлы кәүҙәләндергәне өсөн – Сәкен Сәйфуллин исемендәге Ҡарағанда өлкә академия ҡаҙаҡ драма театрының «Ҡарагүҙ» спектаклендә актриса Анели Һағындыҡова (Ҡаҙағстан). Фестивалде ябыу тантанаһы тура эфирҙа күрһәтелде.