Аҡ юл һеҙгә, йәштәр!

Республикабыҙ мәктәптәрен тамамлаған 14400-ҙән ашыу XI класс уҡыусыһы араһында беҙҙең “Башҡортостан” гәзите журналистары Гүзәлиә Балтабаеваның улы Искәндәр менән Рәүилә Ғатауллинаның ҡыҙы Гөлиә лә бар. Матур традициябыҙға тоғро ҡалып, ошо йәштәр менән осрашып, уларҙың киләсәккә уй-хыялдары хаҡында белештек. Искәндәр менән Гөлиә икеһе лә Р. Ғарипов исемендәге 1-се Башҡорт республика гимназия-интернатын тамамларға йыйына. Дөйөм алғанда, быйыл данлыҡлы белем усағы алты XI класты оло тормош юлына оҙата. Искәндәр Балтабаев физика, математика фәндәрен тәрәнәйтеп өйрәнгән XI “А” класында белем ала. “Гимназия-интернатта ике йыл уҡыным. Бындағы мөхит ғәҙәти ҡала мәктәбенекенән ныҡ айырыла. Туған телдә һөйләшеүгә, милли рух тәрбиәләүгә, традицияларҙы өйрәнеүгә көслө иғтибар бирелә, ошо йәһәттән үҙем өсөн күп яңылыҡ алдым. Республикабыҙҙың төрлө төбәктәренән йыйылған тиҫтерҙәрем тәрбиәле, бер-береһенә ихтирамлы, ярҙамсыл булыуы менән айырыла. Бында яңы дуҫтар таптым”, – ти егет. Ул профилле математика, физика һәм рус теленән БДИ бирергә һәм киләсәген техник тармаҡ менән бәйләргә уйлай. “Имтихандарҙы нисек биреүемә ҡарап, Мәскәү вуздарына уҡырға инеү мөмкинлеген ҡараясаҡмын, шулай уҡ үҙебеҙҙең Өфө дәүләт нефть техник университетын һайларға ла теләк бар”, – ти Искәндәр. – Бөтәһе 28 уҡыусыны – 24 егет менән дүрт ҡыҙҙы берләштергән класс – бик көслө, берҙәм коллектив. Балаларҙың “Уҡыйым, өйрәнәм!” тип атлығып тороуы һоҡландыра. 19 уҡыусы алтын һәм көмөш миҙалға дәғүә итә. Был класта төрлө кимәлдәге олимпиадалар еңеүселәре, Мәскәү, Ҡазан ҡалаларында уҙған конкурстарҙа үҙ проекттарын уңышлы яҡлаусылар бар. Улар менән эшләү бик оҡшаны, уҡыусыларҙы ҙур ышаныс, изге теләк менән оло тормош юлына оҙатабыҙ, – ти XI “А”-ның класс етәксеһе Фирҙәүес Фәнүз ҡыҙы Ҡотлогилдина. Икенсе сығарылыш уҡыусыбыҙ Гөлиә Ғатауллина социаль-иҡтисади йүнәлешле XI “Б” класын тамамлай. “Гимназия-интернатҡа VIII класҡа килдем. Ошо дүрт йыл эсендә бер-беребеҙ менән дуҫлашып, бер ғаилә кеүек йәшәнек һәм белем алдыҡ. Быға тиклем баш ҡаланың ике мәктәбендә уҡырға тура килгәйне. Сағыштырып шуны әйтә алам: гимназия-интернатта дуҫлыҡ, берҙәмлек тойғоһо ныҡ көслө, кәрәкһә, бер-беребеҙ өсөн тауҙай тора алабыҙ. Уҡытыусылар ҙа, тәрбиәселәр ҙә “Һеҙ – беренселәр!” тигән рухты һеңдерә белә”, – тине Гөлиә. Ул IT-тармаҡ йүнәлешендә һөнәр алырға ниәтләнә. “Киләсәктә үҙемде IT-компанияның директоры итеп күрәм”, – тип ышаныслы әйтеп ҡуйҙы ҡыҙ. XI “Б”-ның класс етәксеһе Резеда Сәлих ҡыҙы Шәрәфетдинова ла уҡыусыларынан ҡәнәғәт. – Был класты 18 ҡыҙ, ике егет тамамлай, шуларҙың 11-е миҙалға дәғүә итә. Әле төп бурысыбыҙ – Берҙәм дәүләт имтиханын уңышлы тапшырыу. Әлбиттә, тулҡынланалар, әммә беҙ уларға ышанабыҙ. Уҡыусыларҙың барыһына ла аҡ юлдар, имтихандарҙа һәм һөнәр һайлауҙа уңыштар теләйем. Илебеҙҙең һәм республикабыҙҙың лайыҡлы шәхестәре булһындар! – тине Резеда Сәлих ҡыҙы. Беҙ ҙә уҡытыусыларҙың изге теләктәренә ҡушылабыҙ. Искәндәр менән Гөлиә өлгөһөндә барлыҡ сығарылыш уҡыусыларына бәхетле, имен киләсәк теләйбеҙ. Хыялдарығыҙ тормошҡа ашһын, йәштәр! Фотола: Искәндәр Балтабаев һәм Гөлиә Ғатауллина киләсәккә яҡты хыялдар менән атлай. Айрат Нурмөхәмәтов фотоһы.