Евразия ғилми-белем биреү үҙәгенең Вуз-ара кампусында Башҡортостан Республикаһында уйын эшләнмәләренең көнүҙәк мәсьәләләре буйынса түңәрәк өҫтәл үтте. Осрашыу сиктәрендә Өфө фән һәм технологиялар университеты командаһы «Муха» студияһы менән берлектә «Буран» тактикаһы элементтары менән эшләнгән тарихи уйын проектын тәҡдим итте. Уйындың тарихи контексы 1942 йылдағы (Ржев-Вязем операцияһы) Бөйөк Ватан һуғышы ваҡиғаларына ҡоролған. Башҡортостандан хәрби разведчик фашист ғәскәрҙәренең сигенеүен тотҡарлау бурысы менән вермахт баҫып алған ауылға үтеп инә. Килеп еткәс, ул урындағы халыҡтың проблемаларына юлыға, партизандар менән бәйләнеш булдыра, улар араһында хыянатсы ла табыла һәм башҡалар - бындағы бурыстарҙы хәл итеү төп миссияны тормошҡа ашырырға ярҙам итәсәк. Әммә төп геройҙың ни бары биш кенә көнө бар, һәм бөтәһенә лә ярҙам итеү мөмкин түгел… -Проектты тормошҡа ашырғанда күңел талабын ҡәнәғәтләндереү, белем һәм тәрбиә биреүҙе берләштерергә һәм коммерция йәһәтенән уңышлы продукт алырға тырышабыҙ, ул БДБ һәм дуҫ илдәрҙе лә ҡыҙыҡһындырырлыҡ булһын, - ти Өфө дәүләт нефть техник университетының һанлы спортты үҫтереү бүлеге начальнигы Святослав Пегов. Проекттың үҙенсәлеге шунда: уны эшләүгә Өфө университеты ғалимдары һәм студенттары йәлеп ителгән. Тарихсылар, философтар һәм культурологтар ярҙамында уйын тарихи яҡтан дөрөҫ, әммә шул уҡ ваҡытта ҡыҙыҡлы һәм мауыҡтырғыс булырға тейеш. Студенттар өсөн был легендар «Муха» студияһы белгестәре етәкселегендә етди производство практикаһына әйләнә, һәм, бәлки, ҡайһы бер балалар эш барышында уҡ коллективҡа ҡушыла һәм карьераһын башлай ала. - Проект маҡсатлы видеоуйын кластерын булдырыу өсөн башланғыс булып хеҙмәт итәсәк, ул белгестәр әҙерләйәсәк һәм уңышлы коммерция продукттары сығарасаҡ. Хәтерегеҙгә төшөрәм, Рәсәй Президенты Владимир Путин бер нисә тапҡыр илебеҙҙең видеоуйын индустрияһын үҫтереү һәм үҙ уйын ҡоролмаларын эшләп сығарыу мөһимлеге хаҡында һөйләне. Һәм беҙ был стратегияны тулыһынса үтәргә тырышабыҙ, - тип аңлатма бирҙе Өфө фән һәм технологиялар ректоры Вадим Захаров. Сығанаҡ: https://pravitelstvorb.ru/news/24064/