Бузованан кейеме өсөн, йәғни кейенмәгәне өсөн ғәфү үтендерҙеләр

Артист сараның йәш буйынса сикләүҙәрҙә булыуын, үҙенең сәхнә образының бөтөнлөгөн билдәләй һәм кемдеңдер уңайһыҙлығы өсөн үкенес белдерә. Иҫегеҙгә төшөрәбеҙ, баш ҡалабыҙҙа уҙған VK Fest-ан һуң тамашасылар Бузованың сәхнәгә ярымяланғас сығыуына ризаһыҙлыҡ белдергәйне, хатта улар Тәфтиш комитетына яҙып биргәйне. – Мин быға тиклем элемтәлә булманым һәм илдең иң ҙур һәм төп музыкаль фестивален асыу тантанаһындағы сығышым тирәләй барған бөтә шау-шыуҙы яңы күрҙем, – тип үҙенең социаль селтәрендә Өфө халҡына мөрәжәғәт итте ул кисә. – Мин был фестивалдә 7 йыл рәттән сығыш яһайым. Һәм минең сәхнә образдарым һәр ваҡыт сағыу һәм тикшерелә. Быйыл шулай уҡ, үҙемде үҙгәртмәйенсә, сағыу образда сығыш яһаным. Минең өсөн сәхнә – ул тормоштоң бер өлөшө, һәр ваҡыт сығыштарыма ентекле әҙерләнәм һәм яңы кейемдәр тегәм. Был, киреһенсә, минең һөнәремә һәм тыңлаусыларыма һөйөүем тураһында һөйләй. Белеүемсә, фестивалдең йәш сикләүҙәре бар. Шулай уҡ уға инеү түләүле. Артистар исемлеге һәм сығыштар таймингы алдан баҫтырыла. Әгәр кемдер миңә ҡарарға әҙер булмаһа – минең менән осрашыуға килмәҫкә мөмкин. Мин эмпатик кеше, кешеләрҙе яратам. Һәм һәр ваҡыт кемгәлер насар йәки уңайһыҙ булһа, борсолам. Беҙ командабыҙ менән ғәфү үтенәбеҙ, әгәр минең кейемем һеҙгә мыҫҡыл итеү булып күренһә. Мин һәр ваҡыт Тыуған ил мәнфәғәтенә йәшәйем һәм эшләйем. Был минең һәм халҡым өсөн төп ҡиммәттәр. P.S. Өфө – матур ҡала, һәм шундай уҡ матур кешеләр йәшәй! Һәр ваҡыт шулай булып ҡалығыҙ! Мин һеҙҙе яратам. Һеҙҙең Ольга Бузова. VK Fest Башҡортостанда тәүгә үтте. Шоуҙы ойоштороусылар раҫлауынса, Рәсәй эстрадаһы йондоҙҙарын ҡарау өсөн 13 000 тамашасы килгән. Ольга Бузованы сәхнәлә артыҡ яланғаслығы өсөн тәнҡитләүселәр, “Хөкөм итеүселәр” араһында Екатерина Мизулина һәм Милонов кеүек сәйәсмәндәр ҙә бар. Бөгөнгө ҡатмарлы заманда, балаларыбыҙ, йәштәребеҙ менән Тыуған ил, илһөйәрлек, тоғролоҡ, изгелек кеүек мөһим төшөнсәләр тәңгәлендә тәрбиәләр алып барылғанда Бузованың ғына түгел, ә ғөмүәмән VK Fest-ты ойоштороусылар, режиссер, продюсерҙарҙың был ҡылыҡтарын нисек аңларға? Был фестиваль Өфөлә башланып артабан Рәсәй буйлап күп ҡалаларҙа, меңәрләгән тамашасы йыясаҡ, тип ғорурланып һөйләйҙәр ҙә, әммә яланғас Бузованан Рәсәй халҡына ни фәтүә? Фотолар артистың шәхси архивынан.