Хәҙер инде ер йәшелләнеп, йылы йәйге көндәр тулы кимәлдә хакимлыҡ итә лә башланы. Көндәр төндәрҙән тағы ла оҙонораҡ була бара. Ҡояштың нурҙары көнбайышта юғалып бөтөүгә, көнсығышта күренә лә башлай. Бына шулай, шау-шыулы июнь килә ергә. Көндөҙҙәрен ҡоштар балаларына ашарға эҙләһә, төндәрен һәм таңдарын таң ҡалдырып һайрайҙар. Ә бына кәкүк ай аҙағына саҡырыуын туҡтата. Халыҡта уйынлы-ысынлы итеп: “Кәкүктең тамағына арыш тығылды”, -- тиҙәр.
Хәҙер инде ағастар сәскәһен ҡойоп, емешкә төрөнә башланы. Тап шул мәл йүкә сәскә ата. Ай урталарында алланып турғай еләге бешә башлай. Ул бөтөүгә ҡарай ер еләге ҡыҙара.
Ғәҙәттә июнь ҡоро килә. Дөрөҫ, ҡайһы саҡ ямғырҙары ла булғылай. Улары ла ҡойоп, биҙрәнән ҡойған кеүек яуа. Борсағы ла һорап тормай, дөбөрҙәтеп яуып та китә. Артынса еле иҫеп, ҡояш ҡыҙҙырып, ҡойо-бысраҡтың әҫәрен дә ҡалдырмай. Ә һауа... сафланып китә бындай саҡтарҙа. Күкрәп тултырып һулап туйып булмай!
Халыҡ календарына күҙ һалайыҡ:
Йәйҙең тәүге айы булыуға ҡарамаҫтан кемдер бесәнгә төшә. Емеш-еләк бешә. Рауза, пион кеүек ҡыҙыл төҫлө сәскәләр ата.
Әгәр һандуғас төнө буйына һайрай икән, икенсе көндө көслө ел буласаҡ.
Июндәге ямғырҙар алтын тауға тиң.
Июнь айы йылы булһа, уңыш яҡшы буласаҡ.
Июнь айында ямғырҙан һуң йәйғор пәйҙа булһа, һауа торошо бик оҙаҡ йылы буласаҡ.
Төндә йәшен йыш булһа, уңыш мул буласаҡ.
Әгәр турғай үҙ ояһын ерҙә ҡора икән, йәй бик ҡоро буласаҡ, ә ағаста ҡорһа, ямғырлы була. Әгәр миләш һуң сәскә ата икән, көҙ оҙон буласаҡ.
Июндә томан йыш булһа, бәшмәк күп буласаҡ.
Июнгә ҡара ла декабрҙе күҙалла.
Ҡарлуғас йәй башлай, һандуғастан йәй тамамлана.
Июнь айында сәскәләр сәскә ата, һандуғастар йырлай, июнь айында күңелле, ә ризыҡ аҙ.
Июндә иртән һыу буйлап томан ағыла икән, көн ҡояшлы буласаҡ.
Сәскә атыусы миләшкә бал ҡорттары күпләп йыйылһа, иртәгәһенә һауа торошо һәйбәт булыр
Июндә туғайҙан салғы тотоп үтһәң, июль баҫыуҙан ураҡ тотоп үтерһең.
Июндең егерме һигеҙендә яуған ямғыр ете көнгә һуҙылыр.
