3 июндә Республика йортонда Башҡортостан Башлығы Радий Хәбиров “Транспорт сәғәте” форматында сираттағы тематик кәңәшмә үткәрҙе. Унда, атап әйткәндә, төбәктең һыу ресурстарын һаҡлау һәм йылға транспортын үҫтереү мәсьәләләре тикшерелде. Ҡатнашыусылар билдәләүенсә, был йүнәлештәр бер-береһенә бәйле һәм программа сараларын әҙерләүгә комплекслы ҡараш талап итә. Мәҫәлән, Ағиҙел һыу юлдары районы һәм суднолар йөрөү Кама эске һыу юлдары бассейны хакимиәте филиалы начальнигы Марат Аҡтуғанов, төп бурыс – төп суднолар йөрөүсе йылғаларҙың тулы һыулылығын арттырыу, тип иҫәпләй. Шуға бәйле йылғаларҙың үҙәндәрен таҙартыу һәм уларҙың аҡтарылыуына ҡаршы көрәшеү зарур. Ә Кама бассейны һыу идаралығы етәксеһе урынбаҫары – федераль һыу ресурстары агентлығы филиалы – Башҡортостан буйынса һыу ресурстары бүлеге начальнигы Виталий Тюр антропоген факторҙарҙың кире йоғонтоһон кәметеү кәрәклегенә иғтибар итте. Һүҙ шул иҫәптән йылға үҙәндәрендә ҡом-ҡырсынташ ҡатнашмаһын сығарыуҙы һәм сәнәғәт предприятиеларының һыу ресурстарын файҙаланыуын оптималләштереү тураһында бара. Бынан тыш, эксперт мөхитендә йылғаларҙа бер нисә инженер объекты – быуалар һәм һыу һаҡлағыстар тотоп тороусы каскадтарҙы төҙөүҙең маҡсатҡа ярашлылығы тикшерелә. Башҡортостан Башлығы республика Хөкүмәтенә белгестәрҙең баһаларын анализларға һәм бер ай эсендә төбәктең һыу балансын һаҡлауҙың һөҙөмтәле саралары буйынса тәҡдимдәр индерергә ҡушты. – Киләсәк тураһында уйларға тейешбеҙ. Шуға күрә оҙайлы перспективаға комплекслы документ әҙерләргә кәрәк, – тине Радий Хәбиров. Көн тәртибендәге тағы бер мәсьәлә – республиканың йылға транспортын үҫтереү, тәү сиратта Өфө акваторияһында. Кәңәшмәлә ҡатнашыусылар суднолар паркын һәм туҡтау урыны инфраструктураһын яңыртыу варианттарын, шулай уҡ һанлы сервистарҙы үҫтереүҙе тикшерҙе. Төбәк етәксеһе ошо йәһәттән тәҡдимдәр индерергә ҡушты. – Башҡортостандың Транспорт министрлығы Өфө хакимиәте менән берлектә йылға судноларын үҫтереү концепцияһын әҙерләргә тейеш. Был йүнәлеш, һис шикһеҙ, инвесторҙар өсөн перспективалы баҙар булып тора, – тип билдәләне Радий Хәбиров. – Алынған стратегия параметрҙарын тикшергәндән һуң, беҙ этаплап үтәйәсәк программа документын әҙерләйәсәкбеҙ. Фото һәм мәғлүмәт сығанағы: glavarb.ru