Бөгөн Хөкүмәттең аҙналыҡ кәңәшмәһендә Дәүләт Йыйылышы – Ҡоролтай Рәйесе Константин Толкачев быйыл сентябрҙә үтәсәк һайлау тураһында һөйләне. Парламент спикеры белдереүенсә, депутаттар һуңғы ултырышта быйыл республика Башлығын һайлауҙы өс көнлөк форматта үткәреүҙе раҫлаған. Сәйәси сара 6 сентябрҙән 8 сентябргә тиклем дауам итәсәк. “Депутаттар, һайлау процесы бынан алдағылары кеүек үк, юридик яҡтан дөрөҫ үтер, тигән ышаныс белдерә. Бының өсөн бөтә кәрәкле шарттар ҙа бар”, – тине Константин Толкачев. Радий Хәбиров Башҡортостан Башлығы менән бергә республика халҡы ҡала һәм район округтары депутаттарын һайлаясағын иҫкә төшөрҙө. Ул муниципалитет башлыҡтарына махсус хәрби операция ветерандарының кандидатураһын күрһәтергә ҡушты. – Депутаттар иҫәбенә мотлаҡ рәүештә махсус хәрби опеацияла ҡатнашыусылар эләкһен ине, улар үҙ яуын тамамлап ҡайтҡан да инде. Унда Ватанды һаҡлаусы һәм ысын илһөйәрлектең нимә икәнлеген аңлаған эшлекле, аҡыллы кешеләр бик күп. Шуға күрә уларҙың һәр муниципалитетта булыуын һорайым, – тине Радий Хәбиров. Фото: Башҡортостан Башлығы сайты.