Бөгөн, 21 майҙа, Өфөлә Башҡортостан Башлығы Радий Хәбиров Үзбәкстандың Бохара өлкәһе хокимы Ботир Зарипов менән осрашты. Көн тәртибендә - сәнәғәт, туризм һәм ауыл хужалығы өлкәләрендә төбәк-ара хеҙмәттәшлекте үҫтереү. Башҡортостан менән Үзбәкстанды күп йыллыҡ дуҫлыҡ мөнәсәбәттәре бәйләй, тип һыҙыҡ өҫтөнә алды Радий Хәбиров. - Беҙ Бохараны туристик ҡала булараҡ беләбеҙ. Ул – Үзбәкстан ынйыһы, - тип билдәләне Радий Хәбиров. – Шул уҡ ваҡытта Бохара сәнәғәт төбәге лә. Һеҙҙә нефть эшкәртеү, эшкәртеү сәнәғәте предприятиелары бар, ауыл хужалығы үҫешкән. Һәм беҙ һеҙҙең менән ошо йүнәлештәрҙә үҙ-ара эш итергә әҙербеҙ. Башҡортостан Башлығы шулай уҡ туризм өлкәһендә хеҙмәттәшлектең көнүҙәк булыуын һыҙыҡ өҫтөнә алды. - Бохараға туристар ағымы ҙур. Өс йыл элек Өфө–Сәмәрҡәнд тура авиарейсын астыҡ, осоштар аҙнаһына бер тапҡыр башҡарыла. Ә Ташкентҡа самолет аҙнаһына өс тапҡыр оса, - тип билдәләне Радий Хәбиров. - Беҙ шулай уҡ өлкән быуын вәкилдәре Үзбәкстанға бара алһын өсөн "Башҡорт оҙон ғүмерлелеге. Бохара” программаһын тормошҡа ашырырға әҙер. Тәүҙә 500 пенсионер өсөн тур ойошторасаҡбыҙ. Бохара өлкәһе хокимы Ботир Зарипов ике яҡлы үҙ-ара хеҙмәттәшлекте үҫтереүҙең мөһимлеген билдәләне. – Башҡортостан ерендә йылы ҡабул иткән өсөн рәхмәт белдерәм, - тине Ботир Зарипов. - Һуңғы йылдарҙа Рәсәй Һәм Үзбәкстан күп өлкәләрҙә әүҙем хеҙмәттәшлек итә һәм һөҙөмтә бирә. Туризм тармағында үҙ-ара хеҙмәттәшлек итеү беҙҙең мөнәсәбәттәрҙә үҫеш нөктәләренең береһе булып тора, тип килешәм. Бохарала 850-нән ашыу тарихи объект һәм иҫтәлекле урындар бар. Осрашыу барышында ике төбәк вәкилдәре сәнәғәттә һәм ауыл хужалығында хеҙмәттәшлек йүнәлештәрен дә тикшерҙе. Башҡортостан Бохара өлкәһенән сифатлы йәшелсә-емеш һатып алырға ниәтләй. Шулай уҡ республикала транспорт-логистика үҙәге төҙөргә әҙерҙәр, ул Рәсәй баҙарына Үзбәкстандан, шул иҫәптән Бохара өлкәһенән продукция сығарыу өсөн мөмкинлек бирәсәк. Радий Хәбиров менән Ботир Зарипов Башҡортостан менән Үзбәкстандың үҙ-ара килешеп эш итеү буйынса даими эшләүсе эшсе төркөм сиктәрендә төбәк-ара бәйләнештәрҙе үҫтерергә һөйләшеп килеште. Осрашыуҙан һуң төбәк етәкселәре журналистар менән ике яҡлы хеҙмәттәшлекте үҫтереү буйынса пландары менән уртаҡлашты. - Ысынлап та, Үзбәкстан менән Рәсәй араһындағы яҡшы мөнәсәбәттәр быуаттарға барып тоташа. Хөрмәтле Президенттарыбыҙ Владимир Путин һәм Шавкат Мирзиев үҙ-ара хеҙмәттшлек итеү өсөн ныҡлы нигеҙ һалды. Туризм өлкәһендә тығыҙ хеҙмәттәшлек итергә һөйләштек, – тине Ботир Зарипов. Фото: glavarb.ru