“Газ. Нефть. Технологиялар” күргәҙмәһендәге “Белнефтехим” концернының берҙәм стендында үҙ продукцияһын тәҡдим иткән һигеҙ Беларусь нефть химияһы тармағы предприятиеһы беренсе көндә үк автомобиль тәгәрмәстәре һәм быяла сүстәре менән тәьмин итеүгә Рәсәй аҡсаһы менән ярты миллиардтан ашыу һумлыҡ контракттарға һәм килешеүҙәргә ҡул ҡуйған. Был хаҡта Башҡортостандың тышҡы иҡтисади бәйләнештәр һәм конгресс эшмәкәрлеге министры Маргарита Болычева хәбәр итте. - Беларусь Башҡортостандың алдынғы партнерҙарының береһе булды һәм булып ҡала. Берлектәге тырышлыҡ менән сәнәғәт кооперацияһын үҫтерәбеҙ һәм импортты алмаштырыу йүнәлеше буйынса эшләйбеҙ. Беларусь Республикаһы делегацияһының, 30-ға яҡын вәкилдең, “Газ. Нефть. Технологиялар” күргәҙмәһендә әүҙем эшләүе ҡыуандыра. Алда тағы өс көн күргәҙмә эше бар, шуға күрә яңы ыңғай һөҙөмтәләр көтәбеҙ, – тине Маргарита Болычева. - Белоруссия компаниялары был форумда ун йылдан ашыу ҡатнаша. “Белнефтехим” холдингы предприятиеларының киң экспозиция алып килеүе, форумда әүҙем ҡатнашыуы, продукцияһын тәҡдим итеүе, контракттар төҙөүе яҡшы йолаға әүерелде, – тип хәбәр итте Башҡортостан Республикаһының Рәсәй Федерацияһының Беларусь Республикаһындағы Сауҙа вәкиллеге ҡарамағындағы вәкиле Константин Климин. Рәсәй нефть һәм газ химияһы форумы һәм “Газ. Нефть. Технологиялар” 32-се халыҡ-ара күргәҙмә Өфөлә, «ЭКСПО» күргәҙмә комплексында 21-24 майҙа үтә. Күргәҙмә дөйөм майҙаны 14 500 квадрат метрҙан ашыу булған биш залда урынлашҡан - был күргәҙмә тарихында иң ҙур экспозиция. Күргәҙмәлә Рәсәйҙең 38 төбәгенән, шулай уҡ Белоруссиянан, Ҡытайҙан, Үзбәкстандан, Ирандан 330 компания ҡатнаша. Ойоштороусылары булып Рәсәй Сәнәғәт һәм сауҙа министрлығы булышлығында Башҡортостан Республикаһы Хөкүмәте, БР Сәнәғәт, энергетика һәм инновациялар министрлығы, Башҡортостан күргәҙмә компанияһы тора. Фото: pravitelstvorb.ru