Бөгөн Башҡортостан Хөкүмәте Премьер-министрының беренсе урынбаҫары Урал Килсенбаев район һәм ҡала хакимиәте башлыҡтары урынбаҫарҙары менән дөйөм белем биреү ойошмаларын дәүләт йомғаҡлау аттестацияһын үткәреүгә әҙерлек мәсьәләләре буйынса кәңәшмә үткәрҙе. 2024 йылда республикала урта дөйөм белем биреү программалары буйынса имтихандарҙа бөтәһе 15 504 уҡыусы ҡатнашырға ниәтләй, улар араһында: 14 430 11-се класты тамамлаусы, 905 үткән йылдарҙағы сығарылыш уҡыусыһы, 116 колледж студенты, 11 үткән йылдарҙа 11-се класта дәүләт йомғаҡлау аттестацияһын үтмәгәндәр, 42 10-сы класс уҡыусыһы. Дәүләт йомғаҡлау аттестацияһын үткәреү өсөн 165 имтихан пункты әҙерләнгән. Берҙәм дәүләт имтиханында ҡатнашыусылар араһында иң популяр предметтар: профилле математика - 52,8%, йәмғиәтте өйрәнеү – 35,6%. Төп дөйөм белем биреү программалары буйынса имтихандар тапшырыу өсөн Башҡортостанда 51 347 кеше теркәлгән, уларҙың 46 814-е Төп дәүләт имтиханы формаһында тапшыра. Унда ҡатнашыусылар араһында иң популяр предметтар: информатика - 49,6%, география - 40,7%, йәмғиәтте өйрәнеү - 37,6% һәм биология - 19,9%. Урал Килсенбаев имтихандар үткәреү пункттарында хәүефһеҙлек тәьмин итеү мәсьәләләренә, санитар нормаларҙы һәм ҡағиҙәләрҙе үтәүгә, ойоштороу мәсьәләләренә айырыуса иғтибар бүлде. - Йыл һайын республикала һаулыҡ мөмкинлектәре сикләнгән уҡыусылар, инвалид балалар һәм инвалидтар өсөн имтихандар үткәреүгә ҙур иғтибар бүленә. Йомғаҡлау имтихандарын үткәргәндә имтихандарҙы үткәреүҙең объективлығын иҫәпкә алыуығыҙҙы, төбәк мәғлүмәт системаһына индереү өсөн ҡайтанан тапшырыуға ғариза биргән уҡыусыларҙың исемлеген ваҡытында әҙерләүегеҙҙе һәм программаны үҙләштереүҙә ҡыйынлыҡтар кисергән уҡыусыларҙы өҫтәмә әҙерләүҙе ойоштороуығыҙҙы һорайым, - тип һыҙыҡ өҫтөнә алды кәңәшмә аҙағында Хөкүмәттең беренсе вице-премьеры. Кәңәшмә барышында үткән йылдарҙағы етешһеҙлектәр ентекле анализланды, ағымдағы йылда имтихандар үткәреүҙең өҫтөнлөктәре һәм үҙенсәлектәре, атап әйткәндә, 4 һәм 5 июлдә юғары уҡыу йорттарына документтар ҡабул итеү ваҡыты тамамланғанға тиклем берәр предмет буйынса Берҙәм дәүләт имтиханын ҡабаттан тапшырыу мөмкинлеге ҡаралды. Район һәм ҡала хакимиәттәренә әҙерлек сараларын тулы күләмдә тәьмин итергә, бөтә талаптарҙы үтәп, йомғаҡлау имтихандарын штат режимында үткәрергә ҡушылды. Фото: pravitelstvorb.ru