16 майҙа башланған “Туғанлыҡ” халыҡ-ара милли театрҙар фестивале аҙағына яҡынлаша. 23 майҙа Мәжит Ғафури исмендәге Башҡорт дәүләт академия драма театрында фестивалдең ябылыу тантанаһы уҙа. "Туғанлыҡ" Абхазия, Ҡаҙағстан, Ҡырғыҙстан илдәренән, Башҡортостан, Татарстан, Төньяҡ Осетия – Алания, Мари Иле, Ҡалмыҡстан, Тыва, Дағстан, Сыуаш республикалары театрҙарын берләштерҙе, туғанлыҡ ептәрен нығытты, телдәрҙең һәм мәҙәниәттәрҙең яҡынлығын йәнә бер тапҡыр раҫланы. Мәҫәлән, ҡаҙаҡ шағиры Ғафу Ҡайырбәков һүҙҙәренә композитор Шәмши Ҡалдаянов яҙған “Әсәйемә” йырын төрки телле халыҡтар күптән яратып башҡара. “Туғанлыҡ” фестивале барышында был хисле һәм яғымлы йырҙы Алматы һәм Өфө артистары бергәләп башҡортса һәм ҡаҙаҡса йырлаған.