Бөгөн Өфөләге “ЭКСПО” күргәҙмәләр үҙәгендә Рәсәй нефть, газ һәм химия форумы һәм 32-се “Газ. Нефть. Технологиялар” халыҡ-ара күргәҙмәһе эшен башланы. Башҡортостан Хөкүмәте, Сәнәғәт, энергетика һәм инновациялар министрлығы, Башҡортостан күргәҙмәләр компанияһы Рәсәйҙең Сәнәғәт һәм сауҙа министрлығы ярҙамында ойошторған был форумда илебеҙҙең 38 төбәгенән, шулай уҡ Беларусь, Ҡытай, Үзбәкстан һәм Ирандан 330 компания килде, уларҙың 38 проценты – беренсе тапҡыр. Сарала шулай уҡ 32 ғилми учреждение ҡатнаша. “Рәсәй өсөн дә, беҙҙең республикаға ла нефтехимия комплексы иҡтисадтың арҡа һөйәге булып тора һәм ул илебеҙ тормошоноң дөйөм хәлен билдәләй”, – тине Башҡортостан Башлығы Радий Хәбиров, форумды асыу тантанаһында тәбрикләү һүҙҙәре менән сығыш яһап. – “Бөгөн мин нефть, газ һәм химия комплексы компаниялары етәкселәренә етештереүҙе алға ебәргәндәре өсөн генә түгел, ә инвестиция эшмәкәрлеген әүҙем алып барғандары өсөн дә ҙур рәхмәт белдерәм, етештереүҙе яңыртыу процестары был предприятиеларҙа туҡтамай бара. Йолаға ярашлы, нефть һәм газ форумында беҙ йыл һайын яңы етештереү ҡеүәттәрен асабыҙ, бөгөн дә ошо тармаҡтың өс объекты эшкә ҡушыласаҡ”. Тантанала шулай уҡ Рәсәйҙең сәнәғәт һәм сауҙа министры урынбаҫары Михаил Юрин менән “Газпром” асыҡ акционерҙар йәмғиәтенең идара рәйесе – департамент етәксеһе Олег Аксютин тәбрикләү һүҙҙәре менән сығыш яһаны. Форумды асыу тантанаһы барышында “Башнефть” акционерҙар йәмғиәтенең Дыуан районындағы “Мәтеле” етештереү базаһындағы газ эшкәртеү ҡоролмаһы, Ғафури районындағы Сәйетбаба – Ҡаранйылға – Ҡолҡан ҡасаба-ара газ үткәргесе һәм “ИНТЭКО” инжиниринг компанияһының яңы етештереү ҡеүәте эшкә ҡушылды. Радий Фәрит улының рөхсәте бирелеү менән видеобәйләнештә булған етәкселәр ҡеүәттәрҙе тоҡандырыу кнопкаларына баҫты. Тантана аҙағында Радий Фәрит улы нефть һәм газ тармағының бер төркөм алдынғыларына, ветерандарға дәүләт наградалары тапшырҙы. “Рәсәй нефть, газ һәм химия тармағын үҫтереүҙәге технологик өҫтөнлөктәр: яңы талаптар һәм уларҙы хәл итеү юлдары” исемле пленар ултырыш Рәсәй нефтехимия форумының бөгөнгө көн тәртибендәге төп сара буласаҡ.