Хөкүмәттең бөгөнгө аҙналыҡ кәңәшмәһендә республиканың медицина учреждениеларына урта звено белгестәрен йәлеп итеү буйынса саралар тикшерелде. Республиканың һаулыҡ һаҡлау министры Айрат Рәхмәтуллин хәбәр итеүенсә, Башҡортостандың медицина ойошмаларында 75 832 кеше эшләй, уларҙың 15 меңдән ашыуы – табиптар һәм 37 мең урта медицина хеҙмәткәре. 2023 йыл йомғаҡтары буйынса “Һаулыҡ һаҡлау системаһының медицина ойошмаларын квалификациялы кадрҙар менән тәьмин итеү” төбәк проектының туғыҙ маҡсатлы күрһәткесенең етәүһе үтәлгән. – Ике күрһәткес буйынса билдәләнгән кимәлгә етмәнеләр – ул халыҡты урта медицина хеҙмәткәрҙәре һәм тиҙ ярҙам күрһәтеүсе медицина персоналы менән тәьмин итеү, – тип аңлатты Айрат Рәхмәтуллин. – Урындарҙа йәш белгестәрҙең етерлек күләмдә килмәүе арҡаһында ҡытлыҡ килеп тыуа. Маҡсатлы күрһәткестәргә өлгәшеү өсөн дәүләт медицина ойошмаларына 4 425 урта звено хеҙмәткәрен һәм 340 тиҙ ярҙам белгесен йәлеп итергә кәрәк. Республика етәксеһе ҡушыуы буйынса Һаулыҡ һаҡлау министрлығында муниципалитеттар араһындағы күрһәткестәргә анализ яһалды, шулай уҡ медицина хеҙмәткәрҙәренә күрелгән социаль ярҙам саралары баһаланды. Һүҙ дөйөм ятаҡтарҙа хеҙмәт фатирҙарын һәм бүлмәләрен, социаль найм килешеүе буйынса торлаҡ биналарын, торлаҡты ҡуртымға алған өсөн компенсация, шәхси йорттар төҙөү өсөн ер участкаларын, шулай уҡ бер тапҡыр бирелә торған түләүҙәр биреү хаҡында бара. Бынан тыш, ауыл биләмәләренә белгестәр йәлеп итеү өсөн Башҡортостанда “Ауыл табибы”, “Ауыл фельдшеры” программалары тормошҡа ашырыла. 2023 йыл йомғаҡтары буйынса Башҡортостан был маҡсатҡа федераль бюджеттан бүленгән аҡса суммаһы буйынса ил төбәктәре араһында өсөнсө булды. Дыуан районы хакимиәте башлығы вазифаһын башҡарыусы Айҙар Абдуллин кадрҙар эшенең уңышлы тәжрибәһе менән уртаҡлашты. – Быйыл дүрт фельдшерҙы һәм туғыҙ шәфҡәт туташын эшкә алдылар ҙа инде. Белгестәрҙе йәлеп итеү өсөн Силәбе һәм Свердловск өлкәләренең медицина уҡыу йорттарына барабыҙ, студенттар менән осрашыуҙар үткәрәбеҙ. Унда кәмендә 10 кешенең килеүен көтәбеҙ. Өфө медицина колледжы филиалында быйыл 46 кеше сығарыла, уларҙың 11-е маҡсатлы контракттар буйынса Дыуан районында эшкә урынлаштырыласаҡ, – тип һөйләне Айҙар Абдуллин. – Торлаҡ мәсьәләһе ҙур әһәмиәткә эйә. 2012 йылдан алып биш социаль йорт төҙөлгән, уларҙа медицина хеҙмәткәрҙәре 69 фатир алған. Хәҙер алтынсы йорт төҙөйбөҙ. Ауыл хужалығы министрлығы ярҙамында “Ауыл биләмәләрен комплекслы үҫтереү” программаһы сиктәрендә ауылда алты йорт төҙөргә ниәтләйбеҙ, улар өсөн ер участкалары әҙерләнгән дә инде. Башҡортостан Башлығы Дыуан районы етәкселегенә медицина учреждениеларында кадрҙар мәсьәләһен хәл итеүгә комплекслы ҡараш өсөн рәхмәт белдерҙе. – Бындай яҡшы эшкә яуап итеп 2025 йылда Мәсәғүт педагогия колледжы бинаһына капиталь ремонт үткәрербеҙ, унда шул иҫәптән урта медицина персоналы ла әҙерләнә, – тине Радий Хәбиров. – Проект эштәренә быйыл уҡ тотонорға кәрәк. Шулай уҡ төбәк етәксеһе һаулыҡ һаҡлау учреждениеларын урта медицина хеҙмәткәрҙәре менән тәьмин итеү буйынса маҡсатлы күрһәткестәрҙе үтәмәгән Ҡырмыҫҡалы һәм Иглин райондары хакимиәттәре башлыҡтарының докладтарын тыңланы. – Был эш – оҙайлы ваҡытҡа. Күрһәткестәрҙе арттырығыҙ, уларҙан муниципалитеттар үҫешенә дөйөм баһа барлыҡҡа килә. Әгәр һеҙ ер бирһәгеҙ, торлаҡ бирһәгеҙ, ғаиләләрегеҙҙе балалар баҡсаларында урындар менән тәьмин итһәгеҙ икән, был эшләйәсәк, – тине Радий Хәбиров. – Иҡтисади яҡтан ныҡ райондар кеүекһегеҙ, ә һандар түбән. Потенциал бар, бында эшләнеп бөтмәгән урындар ҙа бар. Маҡсатлы күрһәткестәрҙе 100 процентҡа үтәүгә сығырға кәрәк. Фото:Башҡортостан Башлығы сайты.