“Был һөнәр хыялым түгел ине, әммә хәҙер ул - минең булмышым”

“Башҡортостан” гәзитенең “Бәйләнештә”ге төркөмөндә 27 май – Китапханасылар көнө һәм 24-26 майҙа үтәсәк “Китап байрамы” уңайынан “Китапҡа һөйөү уятам” тигән конкурс башланды. Сираттағы бәйгесебеҙ менән таныштырабыҙ: ул – Ҡалтасы районының балалар моделле китапханаһы китапханасыһы Алина Шамаева. Алина Олеговна Шамаева 1990 йылдың 7 майында Ҡалтасы ауылында тыуған, ошонда буй еткереп, 1-се урта мәктәпте тамамлаған. “Ҡайҙа тыуған – шунда үҙен тапҡан”, тигән әйтем тап Алинаға тура киләлер. Алина Олеговнаның китапханасы һөнәрен һайлауы осраҡлы ғына килеп сыға. - Бала саҡта төрлө һөнәрҙәр тураһында хыялланабыҙ. Минең менән дә шулай булды: был һөнәрҙе һайламаным, ә ул мине һайланы. Мәктәптә гуманитар фәндәрҙе үҙ иттем, кешеләр менән аралашыу, күҙәтеү оҡшай ине. Шуға күрә психолог булырға ҡарар иттем һәм 2008 йылда, өлгөргәнлек аттестаты алғас, Бөрө социаль-педагогия академияһына уҡырға индем. Уны уңышлы тамамлап, дипломлы белгес булып тыуған районына ҡайттым, - тип һөйләй Алина Шамаева. Әммә тормош ҡыҙҙың артабанғы яҙмышын үҙенсә яҙа: йәш белгескә һөнәре буйынса эш табылмай һәм ул ваҡытлыса ғына тип китапханасы булып эшкә урынлаша. “Ғәжәпкә ҡаршы, китапхана эшенә тартылып ҡына ҡалманым, ә уны башкөллө яраттым. Уҡыусылар, китаптар, кәштәләр, журналдар, каталогтар, күргәҙмәләр – был минең донъям, бына инде ун йыл мин ошонда эшләйем. Китапхана йүнәлеше буйынса икенсе белем алдым”, - ти бөгөн Алина Олеговна. Балалар китапханаһында эшләгән белгескә психология буйынса алған белеме лә бик ярап ҡала. Кескәй китап уҡыусылар менән ҡыҙыҡлы саралар ойоштора, үҙе лә республика һәм район конкурстарында әүҙем ҡатнаша. 2023 йылда «Хайуандар донъяһында» халыҡ-ара конкурсында беренсе урынға лайыҡ була. «Башҡортостандың ҡышлаусы ҡоштарына хәстәрлек менән» экологик конкурсында ҡатнашып, «Әҙәби ижад» номинацияһында икенсе урынды яулай. 2015 йылдан балалар моделле китапханаһы ҡарамағында ойошторолған «Әҙәби ҡунаҡхана» театр клубын алып бара. 2023 йылдың ноябрендә коллективы менән халыҡ-ара фестиваль-конкурста ҡатнашып, «Музыкаль театр» номинацияһында беренсе дәрәжә лауреат дипломы менән бүләкләнәләр. Ҡалтасы ауылының коррекция мәктәбендә һаулыҡ мөмкинлектәре сикләнгән балалар менән дә әүҙем эшләй Алина Олеговна, унда төрлө осрашыуҙар, театр һәм ҡурсаҡ тамашалары ойоштора. Шулай уҡ райондың мәҙәниәт бүлеге, балалар баҡсалары һәм мәктәптәр менән дә тығыҙ хеҙмәттәшлек итә. Мәҙәни башланғыстар Президент фонды гранттары конкурсына проекттар әҙерләүҙә әүҙем ҡатнаша. Алина Шамаева йәмәғәт тормошонда ла әүҙем ҡатнаша, «Берҙәм Рәсәй» сәйәси партияһынан кандидат. Дүрт йыл дауамында Калтасы районының территориаль һайлау комиссияһы ағзаһы булып эшләй. Ҡалтасы районының мәҙәниәт ирекмәне булараҡ та изге башланғыстарға ихлас ҡушыла. 2024 йылдың мартында Мәҙәниәт хеҙмәткәрҙәре көнөнә ҡарата Башҡортостан Республикаһы Мәҙәниәт министрлығының Рәхмәт хаты менән бүләкләнгән. Ғаиләһенән дә уңған Алина Олеговна, ул тормош юлдашы менән ике ҡыҙ тәрбиәләй. - Китапхана имиджын китапханасылар үҙҙәре булдыра. Китапхана яҙмышы беҙҙең профессионализмға, белемгә, оҫталыҡҡа һәм шәхси сифаттарға – әҙәплелеккә, уҡымышлылыҡҡа, алсаҡлыҡҡа, изгелеккә, заман менән бергә атлай белеүгә бәйле. Коллегаларым менән китапханабыҙҙы ысын мәҙәниәт һәм мәғлүмәт усағына әйләндерә алдыҡ, тип әйтә алам, - ти үҙ эшен ихлас яратҡан китапханасы. Фотолар: А. Шамаеваның шәхси альбомынан.