Уларҙы һатыуҙың сәбәбе – инвестиция йәлеп итеү

Башҡортостанда 2024 – 2026 йылдарҙа өс дәүләт предприятиеһын һатырға ниәтләйҙәр. Был турала яңыраҡ республиканың Ер һәм мөлкәт мөнәсәбәттәре министрлығы белдерҙе. Дәүләткә ҡараған ойошмаларҙы хосусилаштырыу ниндәй тәртиптә башҡарыла һәм был ниндәй маҡсаттан сығып эшләнә? – Бөгөнгә хосусилаштырыу буйынса прогноз планына индерелгән өс хужалыҡ ойошмаһын – “Зауралье” МТС-ы яуаплылығы сикләнгән йәмғиәтен, “Башплемсервис” яуаплылығы сикләнгән йәмғиәтен һәм “Башзооветснаб” акционерҙар йәмғиәтен – һатыу планлаштырыла. Башҡортостандың Ауыл хужалығы министрлығы менән килешелгән был эштең маҡсаты – республика ҡаҙнаһын тулыландырыу, төбәктең ауыл хужалығы компанияларына ивнестиция йәлеп итеү, киләсәктә уларҙың табышлы эшләүен һәм көнәркәшлек һәләтен арттырыу, – ти республиканың ер һәм мөлкәт мөнәсәбәттәре министры урынбаҫары Фәниә Нафиҡова. Министрлыҡ мәғлүмәттәренә ҡарағанда, 2024 – 2026 йылдарҙа хосусилаштырыуҙың әле ғәмәлдә булған прогноздарына, ошо күрһәтелгән өс предприятиенан тыш, “Милек” һәм “Иглин үлсәү заводы” акционерҙар йәмғиәттәре индерелгән. Уларҙың тәүгеһен – 34 процентҡа, икенсеһен тулыһынса хосусилаштырыу ҡаралған. Министр урынбаҫары әйтеүенсә, был ике һуңғы предприятиеның дәүләт пакеттарын сауҙалашыу нигеҙендә һатыу быға саҡлы үткәрелмәгән һәм хәҙер ошо мәсьәлә эшкәртеү өҫтөндә. Шулай уҡ 2021 – 2023 йылдарҙың хосусилаштырыу планы прогнозы 2026 йылға саҡлы оҙайтылған. Был исемлеккә түбәндәге предприятиелар ингән: – “Башҡортостан электр селтәрҙәре” акционерҙар йәмғиәте (52,39 %); – “Алексеевка” агросәнәғәт комплексы акционерҙар йәмғиәте (100 %); – “Урал-Гео” метрологик тикшеренеүҙәр үҙәге яуаплылығы сикләнгән йәмғиәте (100 %); – “Башкоммунводоканал” акционерҙар йәмғиәте (100 %); – “Башкоммунприбор” акционерҙар йәмғиәте (100 %); – “Башжилкоммунпроект” проектлау институты яуаплылығы сикләнгән йәмғиәте (100 %); – “Башкоммунэнерго” акционерҙар йәмғиәте (100 %); – “Башзооветснаб” акционерҙар йәмғиәте (100 %). “Башҡортостан электр селтәрҙәре”, “Алексеевка” агросәнәғәт комплексы һәм “Урал-Гео” метрологик тикшеренеүҙәр үҙәге яуаплылығы сикләнгән йәмғиәте, шул осорҙағы инвесторҙарҙы күҙ уңында тотоп, сираттағы планлы осорҙоң прогноз планына индерелгән булған. – Хәлдең һәм уларҙың артабанғы эшмәкәрлеге планының үҙгәреүен иҫәпкә алып, был йәмғиәттәр акцияларының дәүләт пакеттарын һәм устав капиталындағы өлөштәрен һатыу ойошторолмаған һәм бөгөн дә планлаштырылмай, – ти министр урынбаҫары. “Башкоммунводоканал”, “Башкоммунприбор” һәм “Башкоммунэнерго” акционерҙар йәмғиәттәренең, “Башжилкоммунпроект” проектлау институты яуаплылығы сикләнгән йәмғиәтенең һатыуға ҡуйылмауының сәбәбе – “республиканың башҡарма власть тармағы булған Торлаҡ-коммуналь хужалыҡ министрлығының кире фекер белдереүе”, тип әйтелә Ер һәм мөлкәт мөнәсәбәттәре министрлығы белдереүендә. – Уларҙы һатыу мәсьәләһе тармаҡ министрлығының позицияһы үҙгәргән хәлдә генә мөмкин буласаҡ, – ти Фәниә Нафиҡова. Министрлыҡ белгестәре аңлатыуынса, “Зауралье” МТС-ы, “Башплемсервис” яуаплылығы сикләнгән йәмғиәттәрен һәм “Башзооветснаб” акционерҙар йәмғиәтен һатыу планы инвестиция йәлеп итеү мөмкинлегенән сығып төҙөлгән. Был планды Ер һәм мөлкәт мөнәсәбәттәре министрлығы республиканың ауыл хужалығы министрлығы менән берлектә төҙөгән, был осраҡта һәр алынған предприятиеның үҫеш мөмкинлектәре ентекләп тикшерелгән, мәғлүмәт тулыһынса эшкәртелгән. Шуға күрә тейешле прогноздар ҙа яһалған һәм, шәхси инвестиция йәлеп итеү юлы менән хосусилаштырыу үткәрелгәндән һуң, ошо предприятиеларҙың үҫеше артабан әүҙемерәк барасағына шик юҡ. Эксперттар билдәләүенсә, дәүләт милкен һатыу процесы – баҙар иҡтисады өсөн тәбиғи күренеш. “Хосусилаштырыу барышында тәүге сиратта иҡтисади йөкмәткенән – табыш, зыян күреү тураһындағы һәм башҡа мәғлүмәттән сығып хәл итергә кәрәк. Әгәр ҙә объект зыян күреп эшләй икән, уның “батмай тороуын” тәьмин итеү өсөн ҡаҙна сығымдарын йәлеп итеү маҡсатҡа ярашлы түгел”, ти улар. Фото: "Башинформ".