Беларусь делегацияһы Бөтә Рәсәй инвестиция һабантуйында ҡатнаша

Башҡортостан Хөкүмәтенән белдереүҙәренсә, Беларусь делегацияһы «Урал аръяғы-2024» Бөтә Рәсәй инвестиция һабантуйында ҡатнашасаҡ. «Урал аръяғы-2024» Бөтә Рәсәй инвестиция һабантуйына тиклем һанаулы ғына көндәр ҡалды. Эшлекле программа сиктәрендә ҡатнашыусылар туризм, инвестициялар, Башҡортостандың яҡын һәм алыҫ сит илдәр менән партнерлыҡ хеҙмәттәшлеге темаларын һәм башҡаларҙы тикшерәсәк. Сарала төрлө илдәрҙән, шул иҫәптән Беларусь Республикаһынан, вәкилдәр ҡатнаша. - Беҙ белорус коллегаларыбыҙ менән тығыҙ хеҙмәттәшлек булдырыуҙы дауам итәбеҙ. Февраль айында Башҡортостан Республикаһы делегацияһының төбәк Башлығы Радий Хәбиров етәкселегендәге сәфәре барышында дөйөм суммаһы яҡынса 50 миллиард һумлыҡ бер нисә инвестиция проектын тормошҡа ашырыу тураһында һөйләшеп килешелде. «Урал аръяғы» инвестиция һабантуйы сиктәрендә хеҙмәттәштәр менән берлектәге эштең яңы йүнәлештәрен тикшерергә, үҙ-ара тауар әйләнешен бер миллиард долларға тиклем арттырыу буйынса бурысты артабан үтәү өсөн перспективалы үҙ-ара эш итеү нөктәләрен билдәләргә планлаштырабыҙ, - тип фекерен уртаҡлашты Башҡортостан Республикаһының тышҡы иҡтисади бәйләнештәр һәм конгресс эшмәкәрлеге министры Маргарита Болычева. «Урал аръяғы-2024» инвестиция һабантуйында федераль һәм төбәк власы, Рәсәй һәм сит ил бизнесы вәкилдәре, инвесторҙар, эксперттар, танылған дәүләт һәм йәмәғәт эшмәкәрҙәре ҡатнаша. Иҫегеҙгә төшөрәбеҙ, «Урал аръяғы-2024» Бөтә Рәсәй инвестиция һабантуйын ойоштороусылар булып Стратегик башланғыстар агентлығы һәм Башҡортостан Хөкүмәте сығыш яһай. Иҡтисади форумда шулай уҡ федераль һәм төбәк дәүләт учреждениелары, Рәсәй һәм сит ил компаниялары вәкилдәре, инвесторҙар, эксперттар, билдәле дәүләт һәм йәмәғәт эшмәкәрҙәре ҡатнашасаҡ. Фото: Башҡортостан Хөкүмәте сайтынан.