“Беҙҙең һөнәр даими уҡыуҙы, үҙебеҙҙең генә түгел, ә ил, донъя әҙәбиәте менән танышып барыуҙы талап итә”, – ти Асҡын районы Ҡарткиҫәк ауылы китапханаһының баш китапханасыһы Динара Нурмөхәмәтова. Ул – ошо ауыл ҡыҙы. Мәктәптән һуң Өфөләге китапхана техникумында белем алғас, тыуған төйәгенә эшкә ҡайтҡан һәм шунан алып әлегәсә хеҙмәтен ҙур теләк, тырышлыҡ, намыҫ менән дауам итә. – Китапханасы – педагог та, психолог та ул. Һәр кемгә – балаға ла, өлкән йәштәгеләргә лә – дөрөҫ һүҙ табырға, ынтылыш бирергә тейешһең. Мин кешеләрҙең күҙҙәренә ҡарап, кәйефен, нимәгә мохтажлығын тойорға тырышам һәм һиҙемләүҙәремә нигеҙләнеп әңгәмә ҡорам, күңелен дауаларлыҡ китап тәҡдим итәм, – ти Динара Нәфҡәт ҡыҙы. – Китапханасы, ғөмүмән, гел халыҡ араһында булырға, тормош һулышын тәрән тойорға, донъялағы хәл-ваҡиғалар менән даими ҡыҙыҡһынып торорға, кешеләрҙе төрлө хәүефтәрҙән, ауырлыҡтарҙан китап, әҙәби әҫәрҙәр ярҙамында араларға тырышырға тейеш. Йәмғиәттә илһөйәрлек тойғоһон көсәйтеү, сәләмәт йәшәүгә әйҙәү, насар ғәҙәттәрҙән, яңылыш юлдарҙан һаҡлау, туған телгә, рухи ҡиммәттәргә һөйөү тәрбиәләү, һаулыҡ мөмкинлектәре сикләнгәндәрҙе социалләштереү – ошо һәм башҡа бихисап бурыстар йөкмәтелгән китапханасы иңенә. Уларҙы урындағы мәктәп, мәҙәниәт йорто хеҙмәткәрҙәре, төрлө берләшмәләр вәкилдәре менән бергә атҡарабыҙ, төрлө сараларҙы даими уҙғарабыҙ. Динара Нәфҡәт ҡыҙы әйтеүенсә, ул һәр ваҡыт яңы белемгә ынтыла. Бер урында торһаң, үҫештән туҡтайһың, ти. Китапханалағы һәр баҫманың йөкмәткеһен яҡшы белә, яңы сыҡҡандарҙы ла уҡып, ауылдаштарына тәҡдим итә бара. Динара Нәфҡәт ҡыҙы шулай уҡ – ауыл мәҙәниәт йорто ҡарамағындағы “Серҙәштәр” фольклор клубы, “Аҡ сәскә” вокал коллективы ағзаһы. Ҡарткиҫәк ауыл Советы депутаты ла. Урындағы барлыҡ йәмәғәт эштәрендә әүҙем ҡатнаша. “Иң йыйнаҡ китапхана”, “Иң яҡшы китапханасы” район конкурстары еңеүсеһе. “Тормошта төп терәгем, әлбиттә, ғаиләм, – ти Динара Нәфҡәт ҡыҙы. – Ирем Ришат Нурмөхәмәтов менән ул һәм ҡыҙ үҫтерҙек, балаларыбыҙ беҙгә ярҙам итеп, таяныс булып йәшәй”. Хөрмәтле дуҫтар! “Башҡортостан” гәзите төркөмөндә барған “Китапҡа һөйөү уятам” конкурсында ҡатнашыусылар өсөн әүҙем тауыш биреүегеҙҙе һорайбыҙ. Фотолар Д. Нурмөхәмәтованың шәхси архивынан алынды.