Элегерәк һәр ихатала үҙҙәре баҫып сығарған ҡош-ҡортто аҫраһалар, хәҙер әҙер себештәр һатып алырға күнеккән халыҡ. Әммә инәһе баҫып сығарып, ҡанаты аҫтында үҫтергән ҡоштарға ҡарағанда, инкубаторҙыҡын ҡарауы күпкә ҡатмарлыраҡ. Әйтеүҙәре буйынса, апрель-май айҙарында сығарылған ҡош иң көслөһө. Кушнаренко районының Иҫке Ҡормаш ауылында йәшәгән Зилә Иҙрисова май башында уҡ бер айлыҡ бройлер себештәре һатып ала. Уларҙы нисек һайлап алыуы, үҫтереүе тураһында хужабикә беҙҙең менән дә бүлеште: - Һайлап алғанда матурырағын алаһың инде, үҙ тәпейендә йөрөгәнен, теремеген. Күтәреп ҡарап алам, ҡулға ауырлығы һиҙелергә тейеш, еңел икән, алырға кәрәкмәй. Бройлер йәшенә ҡарап ҙур булырға тейеш. Һуйыр алдынан да шулай һәр береһен күтәреп ҡарайым, – ти. Бер ай буйы ҡатнаш мал аҙығы (комбикорм) менән туҡланған ҡоштарға өй шарттарында аҙыҡ еткереүе еңелдән түгел, ти хужабикә. Шуға күрә ул үҙе әҙерләгән бутап ашатыуға күскән: “Туңдырғыста субпродукттар ҡалдыҡтары, һөйәктәр, һыйыр майынан тәмле, туҡлыҡлы бутҡа бешерҙем. Ихатабыҙҙа ҡулдан эшләнгән ҡорос мейес һәм ҡалын ҡаҙан бар, шунда бешерәм дә инде. Тәүҙә ит-һөйәк, субпродукттар, ҡалдыҡтар (картуф ҡабығы, емеш ҡабығы, һуған ҡабығы һ.б.), бер аҙ тоҙ һалып бешерәм. Барыһы ла яҡшы бешерелгәс, иген ҡатнашмаһын өҫтәйем – арпа+кукуруз+көнбағыш, нимә бар, барыһын да ҡушам. Бутап, ҡапҡас менән ҡаплайым. Һыуынғансы тотам. Һуңынан, һыуыған аҙыҡҡа бер аҙ ҡатнаш мал аҙығы (комбикорм) өҫтәйем, был яйлап күнегеп китеү өсөн яҡшы. Шунда уҡ өйҙә әҙерләнгән аҙыҡҡа күсмәйем. Туралған йәшел үлән + ваҡланған сей кишер. Бына шундай аҙыҡ менән ҡоштарҙы һуйғансы ашатам. Быйыл һөт (үҙе ойоған һөт, сыворотка, эремсек) юҡ, һыйыр быҙауламаған. Шуға төрлө юлдарын табырға тура килә”, – ти Зилә Иҙрисова. Фотолар Зилә Иҙрисованың шәхси архивынан.