"Кешеләр китап уҡымай, мәктәп балалары китапханаға йөрөмәй", тигән һүҙҙәр менән Дыуан районы Мәсәғүт үҙәкләштерелгән китапханаһының тыуған яҡты өйрәнеү бүлеге мөдире Айгөл Һаҙыева һис кенә лә килешмәй. – Беҙ китапханала төрлө күңелле саралар ойоштороп, олоһон да, кесеһен дә йәлеп итәбеҙ, – тип һөйләй Айгөл Данис ҡыҙы. – Әйтәйек, берәй сара ваҡытында кемдәрҙер китапханаға килде, ти. Береһен дә тиҙ генә ҡайтарып ебәреү яғында түгелбеҙ, ә уларҙы мотлаҡ сарала ҡатнаштырабыҙ. Әйткәндәй, Айгөл Һаҙыева үткәргән кисәне беҙ ҙә тамаша ҡылдыҡ. Ул турист һәм тыуған яҡты өйрәнеү түңәрәгендә ҡатнашыусыларға "Башҡортостан – минең тыуған яғым" тигән тыуған яҡты өйрәнеү сәғәтен уҙғарҙы. Китапханасы башҡорт халҡының йолалары, ғөрөф-ғәҙәттәре тураһында тәфсирләп һөйләне, тыуған төйәгебеҙҙең иҫтәлекле урындары менән таныштырҙы. Беҙҙәге тәбиғәт байлыҡтарын һәм мәҙәни ҡиммәттәрҙе лә телгә алды. Аҙаҡтан викторина һорауҙарына яуап бирҙе сарала ҡатнашыусылар. – Мәсәғүт Балаҡатай, Дыуан, Ҡыйғы һәм Салауат райондары өсөн рухиәт үҙәге һанала, – тине әңгәмәсем. – Тимәк, беҙҙәге китапханаға тик дыуандар ғына йөрөй тиеү ысынбарлыҡҡа тап килеп тә бөтмәй. Беҙ китап фондына ныҡ байбыҙ, китап яратҡандар өсөн ишегебеҙ һәр ваҡыт асыҡ. Фото: Айгөл Һаҙыева.