«Өфөлә Шаляпин кисәләре» халыҡ-ара опера сәнғәте фестивале асылды

19 майҙа Өфөлә «Ике олпат кеше. Шаляпин һәм Горький» әҙәби-музыкаль спектакле күрһәтелә. Йырсы ролендә – Татарстандың атҡаҙанған артисы Алексей Тихомиров (Геликон-Опера), Горький ролендә Иван Крушин (В.И.Качалов исемендәге Өфө академия рус ҙур драма театры) сығыш яһай. 24 майҙа «Төп партияла – Федор Шаляпин» тигән ҙур концерт була. Башопера солистары Шаляпин ҡатнашҡан операларҙан өҙөктәр башҡара. 26 майҙа театрҙың Грек залында романс кисәһе үтә. Башҡорт опера һәм балет театры солисы, Башҡортостандың халыҡ артисы Әлфиә Кәримова камера музыкаһын башҡарыусы булараҡ ҡатнаша. Концертта билдәле музыканттар Рөстәм Шәйхетдинов (рояль) һәм Артур Нәзиуллин (кларнет), шулай уҡ Һарытау академия опера һәм балет театры солисы, халыҡ-ара конкурстар лауреаты Аббасхан Рәхмәтуллаев сығыш яһай. «Өфөлә Шаляпин кисәләре» 27-28 майҙа «Рахманинов. Ғүмер оҙонлоғондағы симфония» балеты менән тамамлана. Федор Иванович партияһын Айгиз Ғиззәтуллин һәм Асҡар Абдразаҡов башҡара. Рахманинов ролендә беренсе көндә – Рәсәйҙең атҡаҙанған артисы Олег Габышев, икенсеһендә Башҡортостандың атҡаҙанған артисы Сергей Бикбулатов сығыш яһай. Фото: Олег Меньков.