Старый стиль
6 мая
ВОСКРЕСЕНЬЕ
Новый стиль
19 мая
Неделя 3-я по Пасхе, свв. жен-мироносиц
Поста нет.
Святых жен-мироносиц: Мари́и Магдалины, Мари́и Клеоповой, Саломи́и, Иоа́нны, Ма́рфы и Мари́и, Суса́нны и иных;
Тропарь Недели жен-мироносиц, глас 2
Мироно́сицам жена́м при гро́бе предста́в А́нгел, вопия́ше:/ ми́ра ме́ртвым суть прили́чна,/ Христо́с же истле́ния яви́ся чуждь./ Но возопи́йте: воскре́се Госпо́дь,// подая́й ми́рови ве́лию ми́лость.
Кондак Недели жен-мироносиц, глас 2
Ра́доватися мироно́сицам повеле́л еси́,/ плач прама́тере Е́вы утоли́л еси́/ воскресе́нием Твои́м, Христе́ Бо́же,/ апо́столом же Твои́м пропове́дати повеле́л еси́:// Спас воскре́се от гро́ба.
правв. Ио́сифа Аримафейского и Никоди́ма (переходящее празднование в Неделю 3-ю по Пасхе);
Прав. И́ова Многострадального (ок. 2000–1500 гг. до Р. Х.).
Тропарь праведному Иову Многострадальному, глас 1
Бога́тство ви́дев доброде́телей И́овлих,/ укра́сти ко́знствоваше пра́ведных враг,/ и, разтерза́в столп телесе́,/ сокро́вище не укра́де ду́ха,/ обре́те бо вооруже́ну непоро́чнаго ду́шу,/ мене́ же и, обнажи́в, плени́,/ предвари́в у́бо мя пре́жде конца́,// изба́ви мя льсти́ваго, Спа́се, и спаси́ мя.
Кондак праведному Иову Многострадальному, глас 8
Я́ко и́стинен и пра́веден, Богочести́в и непоро́чен,/ освяще́н же я́влься всесла́вне, Бо́жий уго́дниче и́стинный,/ просвети́л еси́ мир в терпе́нии твое́м, терпели́вейший и до́блейший.// Те́мже вси, Богому́дре, па́мять твою́ воспева́ем.
Молитва праведному Иову Многострадальному
О, вели́кий пра́ведниче, И́ове Многострада́льне, чи́стым житие́м свои́м и свято́ю бли́зостию к Бо́гу просия́вый. Ты́ до Моисе́а и Христа́ на земли́ пожи́л еси́, вся́ же за́поведи Бо́жия, нося́ и́х в се́рдце свое́м, исполня́л еси́. Явле́нныя ми́ру чрез Христа́ и Его́ Святы́х апо́столов та́йны, глубо́кими свои́ми открове́нии уразуме́в, прича́стник ве́яний Ду́ха Свя́та бы́ти сподо́бился еси́. Вся́кия ко́зни диа́вольския, в по́сланных тебе́ от Го́спода особых искуше́ниих, и́стинным смире́нием свои́м препобеди́в, о́браз злострада́ния и долготерпе́ния все́й вселе́нней яви́лся еси́. Любо́вь ве́лию к Бо́гу и ко все́м лю́дем в безме́рных свои́х ско́рбех сохрани́в, чи́стым се́рдцем за гро́бом едине́ния с Го́сподем ра́достно ожида́л еси́. Ны́не же в селе́ниих пра́ведных пребыва́еши и Престо́лу Бо́жию предстои́ши. Услы́ши на́с гре́шных и непотре́бных, пред свято́ю ико́ною твое́ю предстоя́щих и усе́рдно к хода́тайству твоему́ прибега́ющих. Моли́ Человеколю́бца Бо́га, да в ве́ре кре́пцей, непоро́чней и неруши́мей на́с утверди́т, от вся́каго зла́ вра́г ви́димых и неви́димых защити́т, в ско́рбех и искуше́ниих на́м кре́пость пода́ст, в сердца́х на́ших па́мять сме́ртную при́сно сохрани́т, в долготерпе́нии и братолю́бии укрепи́т, и сподо́бит на́с на стра́шнем суде́ Христо́ве до́брый отве́т да́ти и в воскреше́нней пло́ти на́шей Триеди́наго Бо́га созерца́ти и сла́ву Ему́ со все́ми святы́ми воспева́ти во ве́ки веко́в. Ами́нь.
Преподобного Михе́я Радонежского (1385);
Тропарь преподобному Михею Радонежскому, глас 4
И́го Госпо́дне на ра́мо взем,/ после́довал еси́ Христо́ви со учи́телем свои́м преподо́бным Се́ргием,/ с ни́мже и сподо́бился еси́ ви́дети Пресвяту́ю Богоро́дицу./ И слы́шал еси́ пресла́дкий глас Ея́,/ я́ко обеща́ся неотсту́пна бы́ти ме́ста сего́,/ но, о, преподо́бне Михе́е,// моли́ся о чту́щих святу́ю па́мять твою́.
Кондак преподобному Михею Радонежскому, глас 8
Прииди́те, мона́шествующих собо́ри и по́стников ли́цы,/ соше́дшеся, похва́лим блаже́ннаго Михе́я,/ спо́стника преподо́бнаго Се́ргия,/ с ни́мже предстои́т Святе́й Тро́ице// и мо́лится спасти́ся душа́м на́шим.
Молитва преподобному Михею Радонежскому
О, преблаже́нне и Богому́дре о́тче Михе́е! Ты и́стиннаго Па́стыря Христа́ за́поведи исполня́я, вся́ко весе́лие, е́же в ми́ре, возненави́дел еси́ и житие́ твое́ в слеза́х препровожда́л еси́, теле́сныя стра́сти до конца́ умерщвля́я и во всем после́дуя житию́ учи́теля твоего́ преподо́бнаго Се́ргия, с ни́мже и сподо́бился еси́ ви́дети Небе́сную Цари́цу, Пресвяту́ю Богоро́дицу, посеща́ющую вас и благода́тне обещава́ющую, я́ко неотсту́пна бу́дет от ме́ста сего́. О такове́й, да́нней тебе́ благода́ти, ве́дуще мы, я́ко и ны́не ку́пно с Богоно́сным а́ввою твои́м во оби́телях све́та обита́еши и Го́споду предстои́ши, смире́нно мо́лим тя, к честне́й ра́це твое́й припа́дающе: не преста́ни вку́пе с ним моля́ся о нас ко Го́споду на́шему Иису́су Христу́ и Пречи́стей Его́ Ма́тери, о е́же сохрани́ти страну́ на́шу в ми́ре и благопребыва́нии, побе́ду на враги́ дарова́ти, всем же нам во благоче́стии и чистоте́ и взаи́мной любви́ ти́хое и безмо́лвное житие́ устро́ити, от гла́да, губи́тельства, огня́, меча́, междоусо́бныя бра́ни и от вся́кия беды́ и ну́жды нас изба́вити, да, спасе́ни душе́ю же и те́лом, единоду́шно сла́вим в Тро́ице сла́вимаго Бо́га, Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.
преподобного И́ова Почаевского, игумена (1651);
Тропарь преподобному Иову, игумену Почаевскому, глас 4
Многострада́льнаго пра́отца долготерпе́ние стяжа́в,/ Крести́телеву воздержа́нию уподобля́яся,/ Боже́ственныя же ре́вности обою́ приобща́яся,/ тех имена́ досто́йно прия́ти сподо́бился еси́/ и и́стинныя ве́ры был еси́ пропове́дник безбоя́знен:/ те́мже мона́хов мно́жества ко Христу́ приве́л еси́/ и вся лю́ди в Правосла́вии утверди́л еси́,/ И́ове преподо́бне о́тче наш,// моли́ спасти́ся душа́м на́шим.
Кондак преподобному Иову, игумену Почаевскому, глас 4
Яви́лся еси́ и́стинныя ве́ры столп,/ ева́нгельских же за́поведей ревни́тель,/ горды́ни обличе́ние,/ смире́нным же предста́тель и науче́ние:/ те́мже и ублажа́ющим тя грехо́в отпуще́ние испроси́,/ и оби́тель твою́ невреди́му сохрани́,// И́ове о́тче наш, многострада́льному подо́бный.
Молитва преподобному Иову, игумену Почаевскому
О, преподо́бне о́тче И́ове, и́ноков трудолю́бнаго жития́ богому́дрый наста́вниче, кро́тости и воздержа́ния, чистоты́ и целому́дрия, братолю́бия и нищелю́бия, терпе́ния и бде́ния от ра́нней ю́ности до по́здней ста́рости неутоми́мый подви́жниче, ве́ры Правосла́вныя вели́кий ревни́телю и непреобори́мый побо́рниче, земли́ Волы́нския и Га́лицкия свети́ло благосве́тлое и святы́я Поча́евския оби́тели непобеди́мый защи́тниче! При́зри о́ком благоутро́бия твоего́ на нас недосто́йных чад твои́х, к тебе́ усе́рдно по вся дни прибега́ющих и на боголюби́выя лю́ди сия́, пред твои́ми духоно́сными и многоцеле́бными моща́ми собра́вшияся и благогове́йно к тем припа́дающия, и испроси́ предста́тельством твои́м ко Всевы́шнему Влады́це им и нам вся, я́же к животу́ и благоче́стию, поле́зная и благопотре́бная: боля́щия исцели́, малоду́шныя обо́дри, скорбя́щия уте́ши, оби́димыя заступи́, немощны́я подкрепи́ и пове́рженныя до́лу возста́ви, всем вся, благода́тию от Бо́га да́нною, да́руй, по коего́ждо ну́жде и потре́бе, во спасе́ние души́ и во здра́вие те́лу. Вознеси́ уго́дниче Бо́жий всемо́щную моли́тву твою́ о Росси́йской держа́ве, да бу́дет вы́ну мир и тишина́, благоче́стие и благоде́нствие, в суда́х пра́вда и ми́лость, в сове́тах му́дрость и благо́е преспе́яние, да утвержда́ется же во благи́х челове́цех ве́рность, в злых же страх и боя́знь, во е́же преста́ти им от зла и твори́ти до́брая, да та́ко в держа́ве Росси́йстей ца́рство Христо́во расте́т и мно́жится и да просла́вится в нем Бог, ди́вный во святы́х свои́х: Ему́же еди́ному подоба́ет вся́кая сла́ва, честь и поклоне́ние Отцу́ и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.
Величание преподобному Иову, игумену Почаевскому
Ублажа́ем тя,/ преподо́бне о́тче наш И́ове,/ и чтим святу́ю па́мять твою́,/ наста́вниче мона́хов// и собесе́дниче А́нгелов.
мчч. Ва́рвара воина, Ва́кха, Каллима́ха и Диони́сия (ок. 362);
мч. Ва́рвара Луканского, бывшего разбойника;
Тропарь мученику Варвару Луканскому, бывшему разбойнику, глас 4
Му́ченик Твой, Го́споди, Ва́рвар,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.
Кондак мученику Варвару Луканскому, бывшему разбойнику, глас 3
От Бо́га да́нныя ти благода́ти,/ страстоте́рпче Ва́рваре свя́те,/ я́ко многоце́нным ми́ром, нас посеща́й целе́бне,/ да вопие́м ти:// ра́дуйся, испи́вый сла́достне ча́шу Христо́вых страсте́й.
блгв. Тама́ры, царицы Грузинской (переходящее празднование в Неделю мироносиц).
Тропарь благоверной Тамаре, царице Грузинской, глас 8
Вы́шния красоты́ жела́я,/ ни́жния сла́сти теле́сныя дале́че от себе́ отгна́ла еси́/ и, в черто́зе ца́рском пребыва́ющи,/ а́нгельское житие́ препровожда́ла еси́,/ цари́це Тама́ро блаже́нная,// моли́ Христа́ Бо́га спасти́ся душа́м на́шим.
Молитва благоверной Тамаре, царице Грузинской
О, свята́я вели́кая благове́рная цари́це Тама́ро! Мы́, гре́шнии (имяре́к) и смире́ннии, я́ко к те́плой защи́тнице и ско́рой помо́щнице усе́рдно прибега́ем, прося́ще по́мощи и заступле́ния в бе́здне бе́д погружа́емых, и́же на вся́к де́нь и ча́с на́м от челове́к лука́вых приключа́ющихся, и разли́чными боле́зньми одержи́мых, да твои́м заступле́нием, ко́ль вели́кое дерзнове́ние к Бо́гу име́еши, помоли́сь о на́с в печа́лех, ну́ждах и напа́стех су́щих, и заступи́ на́с от все́х враго́в ви́димых и неви́димых, наипа́че же от бесо́вских ко́зней и хи́тростей, на́глых нападе́ний и льсти́вых подступов, да не бу́дем и́м в поруга́ние и посмея́ние, и твое́ю кре́пкою по́мощию и́х от на́с отгони́, я́коже отгна́ла от страны́ И́верстей и ве́рную любо́вь к Бо́гу в сердца́х на́ших утверди́ и досто́йну соде́лай.
Егда́ же приспе́ет на́ше от вре́меннаго сего́ жития́ отше́ствие и к ве́чности переселе́ние, ско́ро в по́мощь на́м предста́ни, и от наси́лий вра́жиих свободи́, я́ко име́еши жи́знь ве́чную, и приведи́ сердца́ на́ша к и́стинному покая́нию, да и мы́ нескве́рными усты́ и чи́стой со́вестию предста́нем Пресвяте́й Тро́ице, прославля́я и воспева́я Ю́, со все́ми святы́ми в безконе́чныя ве́ки. Ами́нь.
