Борай тарафтарына командировкаға барғанда юл буйындағы Аҡҡош күлен күрергә насип итте. Был үҙенсәлекле урын тураһында һеҙгә лә һөйләйем әле. Башҡортостандың һәр районында үҙенсәлекле, иҫтәлекле, хәҙер модаға ингән һүҙҙәр менән әйткәндә, ҡунаҡтарҙы, туристарҙы йәлеп иткән “тартыу нөктәһе” бар. Ҡурай илендә күлдәр күп, уларҙың һаны ике меңдән ашыу. Һеҙгә үҙенсәлекле тәбиғәт ҡомартҡыһы – Аҡкош күле тураһында һөйләргә теләйем. Ул Борай ауылынан 17 километр алыҫлыҡта – Иҫке Таҙлар ауылы янында, Өфө юлы буйында урынлашҡан ғәжәп һәм бәләкәй күл. Өфө яғынан килгәндә “Аҡҡош күле” күрһәткесе ҡуйылған – уңға боролаһың. Элек был күл генә булған, ә бер нисә йыл элек Борай районы халҡы һәм урындағы власть ял итеү өсөн тотош комплекс төҙөгән. Таш плитәләрҙән һуҡмаҡ һәм йәшел яндауырлы баҫҡыс төҙөлә. Һулдан төшөү менән бер нисә урында төрлө төҫтәге өҫтәлдәр һәм ултырғыстар ҡуйылған. Бала саҡ әкиәттәрен иҫкә төшөрә – әкиәттәрҙә урман халҡы уларҙы йыһаз урынына ҡулланған. Улар янында тиерлек Аҡҡош күле “һаҡсылары” тора, улар ҙа әкиәт персонаждарын хәтерләтә. Бик шәп килеп сыҡҡан. Артабан был ожмахтай ергә алып ингән кәртә тора. Өҫтө Башҡортостан символы булған ҡурай сәскәһе менән биҙәлгән. Һулда һәм уңда ике стенд тора, улар кешеләргә тәбиғәтте һаҡларға кәрәклеген һәм уға ихтирам менән ҡарауыбыҙҙы иҫкәртә. Яҡында ғына бер нисә ағас бесседка ҡуйылған, унда арыған юлсыларға ял итергә, тамаҡ ялғап алырға мөмкин. Шулай уҡ айырым ағас өҫтәлдәр һәм эскәмйәләр бар. Ә артабан – матур урман күренеше. Аҡҡош күле – түңәрәк формала, ул яҡындағы шишмәнән урғылған иң таҙа һыуы менән тулылана. Бына шишмә башлана. Күл янында торғанда унан бөрккән һыуыҡ һауаны тойорға мөмкин. Һыу ятҡылығының диаметры 25 метр, ә тәрәнлеге 5,5 метр тәшкил итә. Күл буйында тағы ла Һыуһылыу эшләп ҡуйғандар. Яңы өйләнешкән парҙар был мөғжизәле урынға килеп, бәхет теләп, йоҙаҡ элә. Никах ныҡлы, ә мөхәббәт мәңгелек булыр, тигән ышаныу бар. Йоҙаҡтарҙы күпергә лә эләләр – уларҙың ниндәйе генә юҡ бында. Күлдең исеменә иһә элек бында йылы ваҡытта парлы аҡҡоштар килеп, оя ҡороуҙан килеп сыҡҡан. Тоғролоҡ ҡоштары ғәжәйеп күлде биҙәгән. Әгәр Борай районында булһағыҙ, мотлаҡ ошо матурлыҡты - Аҡҡош күлен күрмәйенсә ҡайтмағыҙ. Донъя мәшәҡәттәренән аранып, күңел тыныслығын тойорһоғоҙ, күлдең һыуығынан ләззәт алырһығыҙ, ә иң мөһиме – шишмәнең шифалы һыуын эсеп, һыуһынығыҙҙы ҡандырырһығыҙ. Һыуы шул тиклем тәмле, шифалы. Рәмилә МУСИНА фотоһы һәм видеояҙмаһы.