Тормош уны күп һынаһа ла...

Яҙмышҡа ҡаршы барып булмай, тиҙәр. Быға өҫтәп, һәр кемгә тыуғас уҡ үҙ юлы билдәләнгән, тип әйтәләр. Ҡыҙғанысҡа ҡаршы, бәлә-ҡайғы ағас башынан түгел, әҙәм башына йөрөй шул. Әммә арабыҙҙа тормош ауырлыҡтарына зарланмаған кешеләр бар: бер аралашыуҙан уҡ күңелдә тәрән эҙ ҡалдыралар. Ҡырмыҫҡалы районының Ҡырмыҫҡалы ауылынан Флүрә Ғәлинур ҡыҙы Низамова – тап шундайҙарҙан. Район мәҙәниәт һарайында эшләгән, ғүмерен сәнғәт тигән сихри донъяға арнаған, саф башҡорт телендә аралашҡан ҡатын балаларын да туған телгән һөйөү уятып үҫтерә. Бер ҡасан уның тормошҡа, яҙмыш һынауҙарына, бихисап мәшәҡәттәргә зарланыуын ишетмәҫһең. Ҡасандыр яңы тыуған балаһын тәү тапҡыр ҡулына алған һәм йән әрнеткес диагнозды ишеткән әсәнең ниҙәр кисергәнен, ниндәй тетрәнеүҙәр аша үткәнен тик үҙе белә. Ҡыҙғанысҡа ҡаршы, тормош иптәше мәрхүм булғас, икеләтә ауырға төшә Флүрә Ғәлинур ҡыҙына. Үҙен ҡулға ала, артабан тормош йөгөн үҙе генә тарта Флүрә Ғәлинур ҡыҙы. Улының һаулығы, киләсәге тураһында ҡайғырта әсә. Әммә, көтмәгәндә, яҙмыш уға йәнә һынау ебәрә: бер туған һеңлеһе ҡаты сирҙән яҡты донъянан китеп бара. Яңғыҙым балаларымды тәрбиәләйем тимәй, күп тә уйламай, һеңлеһенең улын үҙенә тәрбиәгә алырға йөрьәт итә. ...Ваҡыт үтә, улы Урал да хәҙер үҫкән инде. Үҙе туған башҡорт телендә бих ихлас аралаша, алсаҡ, сос, таныш кешеләрен әллә ҡайҙан күргәс үк сәләмләргә ашыға. Малай көн дә саф һауала йөрөргә ярата: ҡышын – йәйәү атлау, ә урамдар ҡарҙан әрселгәс, велосипедта елдәй елдереү оҡшай. Сәләмәтлегенә бәйле уның мөмкинлектәре бер аҙ сикләнһә лә, бик рухлы, һәләтле һәм тырыш егет ул Урал. Ҡырмыҫҡалы район мәҙәниәт йортонда үткән төрлө сараларҙа ла ҡатнашырға өлгөрә, ҡалаҡ һуғыусылар ансамбленең әүҙем ағзаһы ла. Өҫтәүенә, С.Т. Аксаковтың “Ал сәскә” инклюзив музыка спектаклендә төп ролдәрҙең береһен башҡарған. Бынан тыш, Урал башҡорт халҡының милли музыкаль уйын ҡоралы ҡурайҙа уйнай. Ғөмүмән, әсәһе кеүек сәнғәткә ғашиҡ. – Өлкән улым Тимур – ныҡлы терәгем. Үҙе эшләп йөрөһә лә, бар яҡлап ярҙам итә, туғандарына өлгө булып тора, – ти өс бала әсәһе. Шулай итеп, хәҙер Урал әлеге көндә ағаһы һәм ике туған ҡустыһы менән татыу, ишле ғаиләлә тәрбиәләнә, өй шарттарында белем ала. Уның үҙ көсөнә ышанып, үҙен сәләмәт рухлы тойоп йәшәүендә дөрөҫ йүнәлеш биреүсе туғандарының өлөшө ҙур. Флүрә Ғәлинур ҡыҙы Низамова – күп балалы әсәй һәм тормошон сихри сәнғәт донъяһына, анығыраҡ әйткәндә, Ҡырмыҫҡалы районынан “Сатҡылар” халыҡ театрына арнаған ҡатын. Уларҙың сығышын иһә көтөп алалар. Әйткәндәй, былтыр йыл аҙағында Өфөлә “Театраль Өфө” республика балалар һәм йәштәр театрҙары фестивале үтте. Мостай Кәрим исемендәге Милли йәштәр театрының Бәләкәй залында Өфө, Салауат, Белорет, Бәләбәй ҡалаларынан, Ҡырмыҫҡалы, Туймазы райондарынан 12 спектакль күрһәтелде. Режиссер Нәркәс Хәлитова етәкселегендәге Ҡырмыҫҡалының “Сатҡылар” халыҡ театры был сарала Т. Миңнуллиндың пьесаһы буйынса ҡуйылған “Әсәйҙәр һәм бәпәйҙәр” спектакле менән I дәрәжә лауреат дипломына лайыҡ булды. Халыҡ театры режиссеры – Нәркәс Энгель ҡыҙы Хәлитова. Ә уның ярҙамсыһы – бөгөнгө геройыбыҙ Башҡортостандың атҡаҙанған мәҙәниәт хеҙмәткәре Флүрә Ғәлинур ҡыҙы Низамова. Был вазифаны ул икенсе йыл йыл башҡара. Ә 2000 йылдан Флүрә Низамова режиссер булып эшләгән, 20 йылдан ашыу ғүмерен халыҡ театры үҫешенә арнаған. Эшендә лә һынатмаған, балаларын да аяҡҡа баҫтырырға тырышҡан яңғыҙ әсәгә ныҡлы һаулыҡ, көс һәм сабырлыҡ теләйбеҙ. Улының сәләмәтлеген хәстәрләү өсөн тағы ла күп юлдар үтәһе бар. Флүрә Ғәлинур ҡыҙын, Уралды һәм уның ағаларын Хоҙай ярҙамынан ташламаһын. ҺҮРӘТТӘ: Флүрә Низамова улдары менән. Фото: Флүрә Низамованың шәхси архивынан.