17 майҙа Башҡортостан Башлығы Радий Хәбиров “Ҡатын-ҡыҙ бәхете биләмәһе” Бөтә Рәсәй асыҡ академияһы сиктәрендә БЮТ телеканалының телевизион эфирында ҡатнашты. Билдәле телевизион алып барыусылары Арина Шарапова һәм Дмитрий Каретко ҡатнашлығындағы әңгәмәлә төбәк етәксеһе республиканың йәмәғәт тормошонда ҡатын-ҡыҙ роленең мөһимлеген билдәләне. Радий Хәбиров Башҡортостанда ҡатын-ҡыҙҙарҙың етәксе вазифаларын биләүҙәрен һәм күп өлкәләрҙә һөҙөмтәле эшләүҙәрен әйтте. Мәҫәлән, Иглин һәм Стәрлетамаҡ райондарына ҡатын-ҡыҙҙар етәкселек итә. Байтаҡ гүзәл зат вәкилдәре министрлыҡтарҙа һәм ведомстволарҙа уңышлы эшләй. Республика Башлығы махсус хәрби операцияла ҡатнашыусыларға ярҙам иткәндәре өсөн дә ҡатын-ҡыҙҙарға рәхмәтен белдерҙе. - Алғы һыҙыҡтағы яугирҙәргә улар маскировка селтәрҙәре үрә, кейемдәр тегә, гуманитар ылау йыйыуҙа һәм оҙатыуҙа ҡатнаша. Иң мөһиме - былар уны бергәләп, дәррәү башҡара, сөнки уларҙың хеҙмәтенә яугирҙәребеҙҙең ғүмерҙәре бәйле булыуын аңлайҙар. Һалдаттарға был ярҙам бик тә мөһим. Махсус хәрби операция биләмәһендә бер нисә тапҡыр булдым, беҙҙең яугирҙәр республикала йәшәүселәргә ярҙамдары, иғтибарҙары өсөн һәр ваҡыт рәхмәт белдерә, - тине төбәк етәксеһе. Башҡортостан Башлығы төбәк халҡы өсөн форумдың мөһимлеген дә атаны: - Минең фекеремсә, “Ҡатын-ҡыҙ бәхете биләмәһе”нең сираттағы академияһы уңышлы килеп сыҡты. Бындай йәмәғәт проекттарын иң элек уларҙың халыҡҡа файҙалы булыу йәһәтенән баһалайым. Әгәр ошондай саралар арҡаһында халыҡтың тормошо яҡшырһа, бындай проекттар һис шикһеҙ кәрәк. Фото: Башҡортостан Башлығы сайты.