Бөгөн, 17 майҙа, Өфөләге "Торатау" конгресс-холында Бөтә Рәсәй "Ҡатын-ҡыҙ бәхете биләмәһе" асыҡ академияһы бара. Проектты республикабыҙҙың гүзәл заттары күптән үҙ итте һәм бөгөнгө сарала ла был тойола. Әлеге ваҡытта төрлө майҙансыҡта төрлө темаларға сығыштар тыңланыла, түңәрәк өҫтәлдәр үҙ эшен дауам итә. "Геройҙар дәүере" тигән темаға арналған түңәрәк өҫтәл дә үҙ ҡыҙыҡһыныусыларын йыйҙы. Уны махсус хәрби операцияла ҡатнашыусыларға ярҙам күрһәтеү буйынса "Ватан һаҡсылары" дәүләт фондының Башҡортостан филиалы етәксеһе Гөлнур Ҡолһарина алып барҙы. Сарала ҡатнашыусылар махсус хәрби операцияла һәләк булған яугирҙәрҙең әсәйҙәрен һәм тол ҡатындарын аяғүрә баҫып хөрмәтләне, уларға сәскә гөлләмәләре тапшырылды. Башҡортостандың ғаилә, хеҙмәт һәм халыҡты социаль яҡлау министры Ленара Иванова үҙенең сығышында махсус хәрби операциялағы яугирҙәргә, уларҙың ғаиләләренә төбәктә 39 төрлө ярҙам сараһы булдырылыуы тураһында һөйләне. Бөгөн ҡатын-ҡыҙҙарға ныҡ булырға, көслө тыл булдырырға саҡырған сығыштар айырыуса рухландырҙы. Стәрлетамаҡ районы хакимиәте башлығы Рита Сәмиғуллина ҙур заводтары, эре предприятиелары булмаған райондан 15 автомобиль ебәрелеүенә, 20-се гуманитар ылау әҙерләнеүенә, ауыл халҡының дәррәү булыуына һоҡланыуын белдерҙе. Шулай берҙәм булып, яугирҙәргә таяныс булырға саҡырҙы район етәксеһе. Махсус хәрби операцияла һәләк булған яугирҙәрҙең, Рәсәй Геройҙарың әсәләренең сығыштары ла күңелде тетрәтте, үҙҙәренә һәм батыр улдарына ҡарата ҙур ғорурлыҡ хистәре уятты. "Илебеҙҙең патриоттарын үҫтерәйек. Бер-беребеҙгә иғтибарлы булайыҡ, ярҙам итергә тырышайыҡ, тормоштоң ҡәҙерен беләйек" тигән һүҙҙәрҙең мәғәнәһе нығыраҡ тойолдо. Автор фотолары.