“СПАРКС” йәштәрҙең һәләттәрен үҫтереүҙе маҡсат итеп ҡуя

2024 йылдың 20 майы Башҡортостанда спорт программалауын һәм киберспортты үҫтереүҙә мөһим дата буласаҡ. Тап ошо көндә Евразия ғилми-белем биреү үҙәгенең вуз-ара кампусында Өфө университетының “СПАРКС” спорт программалауы һәм киберспорт үҙәге асыласаҡ. Асыу тантанаһы алдынан байрам ҡунаҡтары “ART-Концепт. Башҡортостан” видеоуйын индустрияһы өсөн концепт-арттар конкурсында ҡатнашҡан эштәр күргәҙмәһе менән таныша аласаҡ. Был конкурс Башҡортостан Башлығы гранттары фонды гранты булышлығында уҙғарылған. Күргәҙмәнең идея авторы – һанлы спортты үҫтереү бүлеге етәксеһе Святослав Пегов, ул был башланғысты Рәсәй рәссамдары ижади союзының Башҡортостандағы төбәк бүлексәһе һәм «Муха» студияһы менән берлектә ойошторҙо. Үҙәктә Өфө университетының Йәштәр сәйәсәте идаралығының Һанлы спортты үҫтереү бүлеге һәм Спорт программалауы зонаһы урынлашасаҡ. Уның эшмәкәрлеген Информатика, математика һәм робот техникаһы институты һәм Спорт программалауы федерацияһының төбәк бүлексәһе үҙ ҡарамағына аласаҡ. Шулай уҡ үҙәктә киберспорт һәм төрҙәш һөнәрҙәр өлкәһендә өҫтәмә белем биреү программалары ғәмәлгә ашырыласаҡ, уның сиктәрендә «уйнар»ға ғына түгел, киберспорт менеджментына, турнирҙар һәм трансляциялар ойошторорға, дизайнға һәм SMM эшмәкәрлегенә лә өйрәтәсәктәр. Йәғни «СПАРКС» буласаҡ абитуриенттарға һөнәри йүнәлеш биреү һәм студенттарҙың һәләттәрен асыу нөктәһе буласаҡ. Үҙәкте асыу ике йүнәлеш буйынса экскурсияларҙан башлана: “Киберспорт” һәм “Программалаштырыу”. Һуңынан киберхәүефһеҙлек буйынса ярыштарға йомғаҡ яһау һәм еңеүселәрҙе бүләкләү була. “КиберУҡыуҙар” тип аталған был ярыш 18-19 майҙа Өфө университетында үтә, унда бөтә Рәсәйҙән командалар йыйыла. Артабан киберспорт буйынса Өфө фән һәм технологиялар университеты ректоры кубогына финал ярыштары асыласаҡ. Унда Өфө университетының бөтә факультеттары, институттары, филиалдарынан 300-ҙән ашыу студент ҡатнаша. Ярыштар түбәндәге дисциплиналар буйынса уҙғарыла: Counter Strike 2, Mobile Legends, Tekken 8, EA FC24. “СПАРКС” үҙәге 20 майҙа көндөҙгө сәғәт 4-тә Евразия ғилми-белем биреү үҙәгенең вуз-ара кампусында (Зәки Вәлиди урамы, 32а, 9-сы ҡат) асыла. Белешмә өсөн: Өфө вуз-ара кампусы Рәсәй Президенты Владимир Путиндың ҡушыуы һәм Рәсәй Фән һәм юғары белем министрлығының «Фән һәм университеттар» милли проектын тормошҡа ашырыуға ярашлы төҙөлә. Өфө кампусы проекты – ул 4,3 мең кешегә иҫәпләнгән торлаҡ биналар, уҡыу-ғилми комплексы, лабораториялар, эшлекле биләмәләр, магазиндар, уңайлы скверҙар һәм башҡа заманса ҡала мөхите объекттары булған студенттар биләмәһе. Сығанаҡ: pravitelstvorb.ru